Nongstoiñ, Naiwieng 10
Ka kynhun ïalehkai jong ka Ri Bhoi United FC ka la khur ïa ka jingjop kaba nyngkong ha kaba sdang ïa ka lympung ïalehkai Invitation Knockout Foot -ball Tournament 2023-24 ba la pynlong da ka New Nongstoiñ Sports Social & Cultural Club.
Kane ka nam jop ka la wan urlong hadien ba ïoh khyrwit haduh 4 kol la nod ïa ka Kanchanjunga FC ha ka sngi Thohdieng ha madan New Nongstoiñ.
Ka jingjop jong ka Ri Bhoi United ka la wan ruh lyngba ki kol ba la ïoh ban thep da u Wanbok Lyngkhoi ha ka minit kaba 22, u Joseph ha ka minit kaba 67, u Emanuel ha ka minit kaba 74 bad ïa ka kol kaba saw la ïoh ban thep da u Paul Iyele ha ka minit kaba 76.
Ha ka jingshisha, ka Kanchanjunga FC ruh ka la dei ban ïoh ban pynphai kylla shi kol lyngba ka penalty ha ka minit kaba 73 ïa kaba la shut da u kapten u Anish Rai, hynrei ka la shu sep ei hadien ba u rang-apkop ka Ri Bhoi United u la lah ban kyrda ban nym ailad ïa ka bol ba kan rung shapoh kol.
Ïa ka nam man of the match la ïoh ban khur da u Paul Iyele na ka Ri Bhoi United FC ha kaba u Bah C.P Mawkon, ADC ka West Khasi Hills u la long kum u kongsan bad ban sam ruh ïa katei ka khusnam.
Nalor u kongsan, ha katei ka sngi la ïadonlang ruh u Bah Sraly Rashir, Sordar ka shnong New Nongstoiñ, Bah G. Syiem -lieh, President ka NNSSCC, kiwei pat ki nongkitkam ka NNSSCC, ki riew rangbah bad kiwei kiwei.
Shuh shuh la pyniphuh iphieng ïa kane ka lympung da ki jingshad ki jingrwai na ki kynhun bapher bapher.
