Shillong, Naiwieng 10
Ka Ïaiphyrnai S&YA ka la khur ïa ka jingjop ha ka Super League jong ka lympung ïalehkai 4th (L) K. M Diengdoh Memorial Sohra Football League 1st Division ba la pynïaid da ka Sohra Sports Association (SaSA).
Kane ka nam jop ka la wan hadien ba ka la lah ban pynliem noh ïa ka Seng Samla Laitryngew da 4-0 kol ha ka 7 tarik mynta u bnai ha madan ïalehkai jong ka Sohra Sports Association kaba don ha Saitsohpen, Sohra.
U Levenstar Nongkynrih u la ïoh ban thep ar kol ha ka minit kaba 35 & 44, katba ïa kiwei pat la pynbud da u Robin Kurkalang (75) bad u Charbes Lyngdoh Mawphlang (78).
Haba phai ha kawei pat ka jingïakhun kaba la long ha ka 8 tarik hapdeng ka Seng Samla Mawmluh bad ka Royal FC kim shym la lah ban pynkhih jar haduh kaba kut ka jingïalehkai.
Kane ka lympung kan bteng biang ha ka 13 tarik hapdeng ka Royal FC pyrshah ia ka Seng Samla Laitryngew.
