Shillong, Naiwieng 10
Ka Mylliem Lum SC ka la pynliem noh ïa ka Nongmensong SC da 2-0 kol na ka bynta ban jam sha ka semi final ha ka lympung ïalehkai 3rd Division Football League 2023 ba la pynïaid da ka Shillong Sports Association.
Kane ka la wan urlong lyngba u Elias Nongsiej na ka bynta ban long ka kynhun kaba lai ban jam sha kane ka kyrdan ïalehkai kata hadien ïa ka MLP bad ka PFR.
Ha ka jingïakhun quar -ter final kaba la long ha ka sngi Thohdieng ha 1st Ground SSA Stadium Polo, baroh ar ki kynhun ki la pyrshang ban ïakhun tyngeh. Ka Mylliem Lum ka la ïoh ban pynkhih jar nyngkong eh ha ka minit kaba 20 lyngba u Elias bad kane ka shi kol ka la ïai neh haduh kaba kut jong ka kylla step.
Hadien katto katne por ba la bteng ïa ka jingïakhun jong ka kyll miet, u Elias u la thep biang ïa ka kol kaba ar ka jong u ha ka minit kaba 57. Watla ka Nong-mensong ka la pyrshang ban pynphai, hynrei kam shym la lah ban pynurlong haduh kaba kut ka jingïalehkai bad ka la mad ïa ka jingshah rem.
Ka jingïakhun quarter final kaba khatduh kan long ha ka sngi Saitjaiñ hapdeng ka Tynring SC pyrshah ïa ka Nongkseh SC ha ka por 2 baje janmiet.
