Shillong, Naiwieng 10
Ka Archery Association of Meghalaya (AAM) ka la ai khublei kitbok kitrwiang ïa ka kynhun ïalehkai siatkhnam ka Jylla ka ban pynkhreh ban leit ïashim bynta ha ka 43rd NTPC Junior National Archery Championship 2023 ka ban long ha Bharatpur, Rajasthan ka ban sdang naduh 15 haduh 22 tarik mynta u bnai.
Kitei ki dkhot ka synjuk kiba kynthup ïa u Vice-President Bah Goldenstar Kharbuli, Assistant Secretary Bah R.P. Ryntathiang bad u Treasurer Bah Banteilang Niangti, kiba la wan ban ïakynduh ïa katei ka kynhun ha ka sngi Thohdieng ha SAI Training Centre na ka bynta ban ai ïa ki kyntien kitbok kitrwiang ïa kitei ki khynnah ba kin ïalehkai bha ha katei ka lympung.
Ka kynhun ki nongsiat jong ka Recurve Division kan mih na ka nongbah ha ka 13 tarik bad yn ïalam ïa ka da u coach Archery jong ka SAI Training Centre u Gunin Changmai. Katba ka kynhun ki nongsiat jong ka Indian round kan mih na ka nongbah ha ka 17 tarik ha kaba yn ïalam da u Bahaman Lyngkhoi (junior Archery coach jong ka shlem treikam ka District Sports Officer (DSO) East Garo Hills bad Manager u Phrangkupar Kharjahrin.
Ki nongïalehkai ha ka Recurve ki long u Amebalaker Wanñiang, Vivek Sunar, Devraj Mahapatra bad u Hypormi Wanñiang, katba ha ka liang ki kynthei ki long ka Navidisha Kokil Kapoor, Dawan-dashisha Pasi, Daphishisha Jamu bad ka Andrica Nongsiej.
Ha ka Indian Round yn leit ïashim bynta tang da ki shynrang kiba kynthup ïa u Wankermo O Wanñiang, Aiboklang nongrum, Donkupar Nongkharit bad u Wanpynskhem Marweiñ.
Lah ban kdew ba haashwa ban sei ïa kitei ki nongïalehkai ki ban mihkhmat ïa ka Jylla, na ka liang ka AAM ka la pynlong ïa ka jingjied khynnah kaba janai (trials) ha kaba ka la jied tang mar hynriew ngut na kawei pa kawei ka kyrdan ïalehkai bad khmatduh ïawai ka la lah ban jied sa tang mar saw ngut ki nongïalehkai kiba kynsai. Hadien ba la jied ba jied na ka liang ka synjuk ka la pynlong sa ka prokram ai jinghikai kaba 20 sngi ïa kitei ki khynnah. Te kumta la khmih lynti ba kitei ki khynnah kin ïalehkai bha na ka bynta ban khur jingjop ha katei ka lympung.
