Shillong, Naiwieng 10
Ki khlur ïakura jong ka ri kin wan ïuh-kjat ha kane ka nongbah ban ïashim bynta ha ka rynsan ïakura jong ka 7th Elite Men’s National Boxing Championship ka ban long ha SAI Training Centre, Shillong.
Kine ki kynthup ïa u Amit Panghal, Deepak, Sachin, Shiva Thapa, Manish Kaushik, Govind Sahani, Vishwanath Suresh, Bishwamitra Chongtham bad kiwei.
Ïa kane ka rynsan ïakura yn pynlong da ka Meghalaya Boxing Association (MBA) ha ryngkat ka Boxing Federation of India (BFI) bad ka ban kyrshan lang da ka tnat ïalehkai jong ka Sorkar Jylla ka ban sdang naduh 25 tarik mynta u bnai haduh 1 tarik u Nohprah.
Haba ïakren bad ki nongthoh khubor ha ka sngi Thohdieng, ki nongïalam ka MBA kita u Bah Cornelius Kharhunai u la pynpaw, “Ngi sngew-kmen ba na ka liang ka Sorkar Jylla lyngba ka tnat ïalehkai ka la wanrah ïa ka rynsan ïakura ha kane ka nongbah bad ka jingthmu ka long hi ban plie lad ïa ki rangïakura ka Jylla ba kin ïoh ban ïashim bynta ha kane ka lympung bad ban pyni ïa ki sap ïalehkai ba ki don.”
U Joint Secretary BFI u Bah Larry Kharpran bad uba long ruh u Organising Secretary jong kane ka rynsan ïakura, u la ïathuh ba ha kane ka lympung kin don palat 350 ngut ki rangïakura ki ban wan shim bynta na ki 28 tylli ki Jylla jong ka ri bad union territory. “Ha ka jingshisha ka jingwanrah ïa kane ka rynsan ïakura sha kane ka nongbah Shillong ka dei lyngba ka jingshim khia da ka BFI. Kane ka rynsan ïakura ka long na ka bynta ban plie lad ïa kito ki rangïakura ki bym pat shym la ïoh rung sha ka Paris Olympic ka ban long ha u snem ban wan.”
“Ha kane ka rynsan ïakura kin don la ki jong ki kyrdan ïalehkai kata naduh 46kg haduh 92kg.”
Haba phai sha ki rangïakura ka Jylla, ka Meghalaya Boxing Association ka la khmih lynti ban sei kumba 10 ngut ki rangïakura.
Ha kaba ïadei bad ka jinglut jingsep ha kane ka rynsan ïakura ka ban neh haduh hynriew sngi lynter, u Bah Kharpran u la ïathuh ba ka jinglut kan long kumba T. 1 klur tam. “Ngi khmih lynti ba ngin ïoh jingïarap na ka Sorkar Jylla halor kine ki jinglut jingsep bad kumjuh na ka BFI. Haduh mynta ngim shim ïoh ki jingïarap na ki kompani bapher bapher lait na ka Sorkar Jylla bad ka BFI.”
