Shillong, Naiwieng 12
Ka India ka la bteng ban khur ïa ki nam jop ha ka lympung World Cup 2023 namar ka la jop baroh khyndai tylli ki jingïakhun haduh mynta. Kane ka la wan hadien ba ka lah pat ban pynliem sa ïa ka Netherlands da 160 run ha ka jingïalehkai kaba la long ha ka Sngi U Blei ha Bengaluru.
Kumba ka long mynta ka India ka la lah ban pynpaw ïalade kum kawei na ki Ri kiba khlaiñ bor ha kane ka World Cup, hadien ba ka la lah ban khur jingjop ha baroh 9 tylli ki jingïakhun khamtam ruh ban jop ïa kiwei pat ki Ri kiba khlaiñ kum ka Australia, Pakistan, New Zealand, South Africa bad England.
Lyngba kane ka jingjop, ka India ka la kamai 18 point na ki 9 tylli ki jingïalehkai bad ban don ha ka kyrdan ba nyngkong ha ka miej ïakheiñ point.
Hadien kane ka jingjop, mynta ka India kan pynkhreh pat ban ïakhun pyrshah ïa ka New Zealand ha ka semi-final ka ban long ha ka 15 tarik mynta u bnai.
Haba phai sha ka jingïalehkai, ka India kaba la tied nyngkong ka la lah ban kamai haduh 410 run na ki 50 tylli ki over bad hap tang 4 wiket. U Shreyas Iyer u la tied 128 run na ki 94 tylli ki bol, u KL Rahul u la tied 102 run na ki 62 bol bad ruh u Rohit Sharma, Virat Kohli bad Shubman Gill ki la tied palat ïa ka 50 run.
Haba beh ïa kane ka thong, ki nongtied ka Netherlands ki la lah ban kamai tang 250 run bad hap lut ki wiket baroh na ki 47.5 over. U Teja Nidamanuru uba la lah ban tied marwei haduh 54 run bad u Sybrand Engelbrecht uba la tied 45 run. U Mohammed Siraj, u Jasprit Bumrah, u Kuldeep Yadav bad u Ravindra Jadeja ki la ïoh ban khur mar 2 wiket, katba u Rohit Sharma bad u Virat Kohli ki la khur mar shi wiket.
