Shillong, Naiwieng 12
Kum shibynta ban kyntiew shaphrang ïa ki samla ba donsap ha ka phutbol jong ka thaiñ Newshillong Circle naduh Mawpdang, Mawkasiang, Umroh, Tyn ring, Mawlynrei, Dieng-iong, Siejiong, Ishyrwat bad kiwei kiwei, ka HANM Newshillong Circle ka la pynlong da ka lympung kynjat bol ba shi sngi ha ka sngi Saitjaiñ ka 11 tarik mynta u bnai ha madan Mawdiangdiang.
Ha kane ka lympung kaba la wan ïashim bynta da 11 tylli ki kynhun ïalehkai ym shym la lah shuh ban pyndep tang ha ka shi sngi. Kumta ki nongpynïaid kin hap ban rah noh sha kawei pat ka sngi, ha kaba ïa ka tarik yn sa pynbna.
Kumba ka long mynta, ki jingïalehkai ba sah jong kane ka lympung ki long sa tang ka semi-final bad final. Ki kynhun ba la rung sha ka semi-final ki long ka Umroh B ka ban ïa-khun pyrshah ïa ka Nang-kiew Shaphrang Sports Club bad ka Veteran Football Club ka ban ïakhun pyrshah ïa ka Ïatyllilang Sports Club.
Ha kane ka sngi, ïa ka lympung la wan plie da u Bah Ritto Sing Syiem ryngkat ka jingïadon lang u Bah William Nong-khlaw, Rangbah Dong Mawdiangdiang bad ki nongïalam shnong kumjuh u President ka HANM Sengkmie Bah Lamphrang Kharbani bad kiwei kiwei.
U Bah Lamphrang ha ka jingkren u la ai jingïaroh ïa kane ka circle wat la khlem shah jied ban leit Delhi ha kine ki sngi ba la dep hynrei ka jingtreikam jong ki, ka long kaba shong khia bha na bynta ka imlang sahlang.
U Bah Lamphrang u la pynkynmaw ba watla ki 3 ngut ki nongïalam ka circle ha ki bnai ba lah ki la shah set pathok na bynta ki daw bah ka jaidbynriew hynrei mynta pat ki la mih ban pynïaid ïa kane ka lympung ban ailad ïa ki samla bad nongshong shnong ka thaiñ Newshillong.
