Shillong, Naiwieng 12
Ka kynhun ïalehkai phutbol ka Meghalaya ka la sdang ïa ka lympung 28th Senior Women’s National Football Championship 2023-24, da ka nam rem hadien ba ka la shah pynliem noh ha ki ‘thei ïalehkai ka Odisha.
Ha kane ka jingïalehkai kaba la long ha ka sngi U Blei ha Sundargarh Stadium, Odisha, ki ‘thei ïalehkai ka Meghalaya ki la shah pynliem noh da 3-1 kol ha ki ‘thei ka Odisha.
Haba phai sha ka jingïalehkai, dei ka Odisha kaba la ïoh khyrwit kol nyngkong lyngba ka Deepa Nayak ha ka minit ba 32 bad tang ha ka minit ba 35 ka Malati Munda ka la lah ban pyntam da 2 kol. Haba bteng ïa ka kylla miet, kata ha ka minit kaba 51 ka Meghalaya lyngba ka Sunalinda Iawren ka la ïoh ban pynphai shi kol hynrei kane ka kol kam shym la lah ban khanglad, bad tang hadien 2 minit kata ha ka minit ba 53 ka Odisha lyngba ka Deepa Nayak ka la ïoh ïa ka kol kaba 3.
Ha kane ka jingïalehkai jong kane ka sngi, ka Bannya Kabiraj, ka ‘thei ïalehkai jong ka Odisha ka la khur ïa ka nam ‘Player of the Match’.
Ha kawei pat ka jingïalang jong kane ka lympung kaba la long ha Sundargarh Stadium, ka Goa ka la lah ban pynliem noh ïa ka Arunachal Pradesh da 3-1 kol.
Hadien kane ka jingshah rem, ka Meghalaya mynta kan pynkhreh pat ban ïakhun pyrshah sa ïa ka Gujarat ka ban long ha ka 14 tarik mynta u bnai, katba ka Arunachal Pradesh kan ïakhun pyrshah ïa ka Odisha ha kane kajuh ka sngi.
