Shillong, Naiwieng 12
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai ba la pynlong ha ka sngi Saitjaiñ, ka jingïakhun ha ka First Division kaba la long hapdeng ka Kyrphei Sports Club pyrshah ïa ka Pyndenumbri Sports Club ka la kut noh ha ka jingïakhaid da mar shi kol.
Haba phai sha ka jingïalehkai ba la long ha katei ka sngi ha madan Tyrsad, dei ka Kyrphei SC kaba la ïoh ban khyrwit ïa ka kol kaba nyngkong lyngba u Bankitlang Kharsyntiew ha ka minit ba 51 hynrei ha ka minit kaba 78 jong ka jingïalehkai ka Pyndenumbri SC ka la lah ban pynphai noh lyngba u Ditoles Hynniewta.
Lyngba kane ka jingïakhaid ka la pynthikna ruh ïa ka Pyndenumbri SC ba kan hap hiar noh sha ka kyrdan 2nd Division ha ka aiom ban wan namar ka jingbym lah ban kamai point ha kine ki jingïakhun ba la dep.
Haba phai pat sha ka jingïalehkai ha ka Third Division, ka Raimulong Sports Club ka la lah ban pynliem noh ïa ka Mawkanoh Sports Club da 2-0 kol. Ïa ki kol jong ka Raimulong, la ïoh ban thep da u Banjoplang Kharryngki ha ka minit ba 2 bad u Shestar Warjri ha ka minit ba 54.
Ha kawei pat ka jingïalehkai jong ka Third Division, ka Wahnongkseh Sports Club ka la lah ban pynliem noh ïa ka Laitsohphlang Sports Club da 3-2 kol.
Ki jingïalehkai ban wan jong kane ka lympung, kin long ne bteng biang pat ha ka 18 tarik u Naiwieng, kata ka jingïakhun ha ka Third Division kan long hapdeng ka Lyngdoh Phanblang Sports Club pyrshah ïa ka Mawkynroh Sports Club ha ka por 11 baje mynstep, ha ka Second Division pat ka Ramklang Sports Club kan ïakhun pyrshah ïa ka Laitmawhing Sports Club ha ka por 1 baje mynsngi bad ha ka First Division pat ka Pomsanngut Sports Club kan ïakhun pyrshah ïa ka Rangshangkham Sports Club ha ka por 2.30 janmiet.
