Bah J. J. Lyngkhoi
Ka Shillong Cherry Blossom Festival ka dei kawei na ki Tamasa kaba heh duh ha Jylla kaba la pynlong lyng-ba ka Tnad Jngoh Kai Pyrthei. Kane ka Tamasa U Dieng Japan (Cherry blossom) mynta u Snem (2023) kan long ha Ri Bhoi Dist hapoh Madan Phutbol Kurkalang Bhoirymbong ka ban sdang naduh ka 17 tarik Naiwieng bad kan kut ha ka 19 Tarik Naiwieng 2023. Ha kane ka Tamasa katkum ki khubor ba ngi iohi khamtam lyngba ka jingkren u Myntri ka jngoh kai Pyrthei U Bah Paul Lyngdoh ha ki rynsan Social media. Kin don shibun ki nongrwai ba pawnam bad ki kynhun tem jong ka Pyrthei ki ban wan pynshongshit ha kane ka Tamasa kum u Ronan Keating, Jonas Blue, Pink Panda, NE – YO, Kenny Mass, Sanam bad ki Nongrwai ba paw ka Jylla kiba kynthup ïa U Leo Majaw, Snow White, Meba Ophilia, Daminot, Rhem, Blue Temptation, Wanjop Sohklet, Dariti. Ha kane ka Tamasa kin don shibun ki jait jingïalehkai bapher bapher kum ka Miss & Mr. Pigen Cherry blossom Singing Contest, Choir Contest Cost Play bad kiwei kiwei de. Ka Sorkar jylla lyngba ka tnat jngoh kai Pyrthei ka la mang kumba T. 9 klur tyngka ban pynlut ha kane ka Tamasa u Dieng Japan (Cherry blossom). Wat la mih ki jingpyrshah na kiba bun ki Nongshong Shnong na ka Jylla namar kane ka Sngi pynkut ïa kane ka Tamasa kata ka 19tarik Naiwieng ka dei ka Sngi U Blei kaba la ïa tyngkhu bad ka Jingshakri Blei jong ki Khristan. Ngi ïohi lyngba ki lad pathai khubor ki YouTube ba la mih ki ‘riew paidbah na ki Nongshong Shnong ka Them Ri Bhoi ban pynsngew ha ka Sorkar ba kan pynkylla noh ia ka tarik namar ka ïa tyngkhu bad ka Sngi U Trai. La mih ki Seng Bhalang naduh ka Seng Kynthei kum ka STIEH kawei na ki Seng Kynthei hapoh ka jingïalam jong ka Kong Purity Phawa nangta ka Joint Action Committee (JAC) Ri Bhoi Dist ka kynthup ïa ki katto katne ki Seng Bhalang na Ri Bhoi. Ka HANM West Khasi Hill Dist nangta la mih ruh ki Nongïalam niam na ka Ri Bhoi Mihngi Presbyteryh lyngba U Pastor M. Moksha Moderator ka Presbytery, Pastor Batkupar Dunai ban pynpaw ïa ka jingsngew pyrshah ïa kane ka Sngi namar ka dei ka Sngi U Trai la mih ruh ka jingpyrshah na ka Seng Saiñ Pyrthei kiba la ai jingmut ïa ka Sorkar ba kan pynkylla noh ïa ka Tarik. Hynrei kane ka jingpyrshah na kiba bun imat ka Sorkar kan nym mushia ei ei ruh em. Kumba ngi iohi ruh ïa ka jingkren U Symbud Myntri Rangbah Bah Preston Tynsong ba ym lah ban pynkynriah hynrei ka Sorkar kan sdang ïa kane ka Tamasa ha-dien da la wai jingïaseng baar kata 3baje ha jrong. Tip shuh kaei ban jia ha kane ka Sngi lada ka Sorkar kan sa ïaid beit shakhmat nga tip kan don ka jingktah bad jingsngew naba bun ki Khristan namar kumba ngi tip ka Jylla jong ngi ka dei ka Jylla Khristan. Haoid ngi tip ba kane ka Tamasa U Dieng Japan kiba wan ïa shim bynta kin kham bun kiba nabar Jylla ne wat nabar Ri. Ngim tip haduh katno kane ka Tamasa kan ai jingmyntoi ïa ka Jylla jong ngi ne haduh katno kan ai kam ai jam ïa ki khun Samla jong ngi. Kumba ngi ïohi ïa ka jingkren u Myntri jngoh kai Pyrthei ba ka jingpynlong ïa kane ka Tamasa kan long ka jingmyntoi ne kan pynkiew ïa ka ïoh ka kot jong ka jylla. Hynrei nga ïohi ki don ki khun Samla jong ngi ki bym ïoh ban ïa shim bynta ha kane ka Tamasa kum kine ki Samla pynmih waiñ (local Wine) namar hana ym shah ban buh ïa ki waiñ hapoh kane ka tamasa Cherry Blossom namar ka dei ka jingdih ba pynbuaid. Kane ka dei katkum ka jingkren na U Samla Ribok Nongspung uba dei u min local wine wat la ki la ïoh ka jingithuh na ka Sorkar ne laisen katba ïa ki Company nabar la shah ban buh ïa ka Brand Wine wat la ka dei ka jingdih ba pynbuaid ruh. Kane ka pyni ba kane ka Tamasa kumba ka dei ka Tamasa Nongwei ne u Dieng Japan ka long ruh kumta wat ka Sorkar ka kham pyrkhat ïa ki Nongwei ha ka jingiohi jong nga shimet nga lap ba kane ka Tamasa tikna kan sah pynjot ïa bun ki khun Samla jongngi. Kumta kum uwei na ki Nongshong Shnong jong ka Jylla. Lyngba kane ka Artikle nga dap da ka jingsngewkhia haba nga iohi ïa kane ka jingthmu ka Sorkar ban ïaid beit sha khmat ia kane ka Tamasa wat kiba bun ki la pyrshah kum na nga la kdew haneng kane ka tamasa kan kut ha ka Sngi U Trai ngi tip ym ba ki pyrshah ïa kane ka Tamasa hynrei ngi pyrshah ïa ka tarik ba kut namar ka dei ka Sngi U Blei. Kumta lyngba kane ka kyrwoh khubor bad lyngba kane ka Artikle jong nga nga kyntu ïa ka Sorkar khamtam ïa U Myntri Jngoh Kai Pyrthei U Bah Paul Lyngdoh ba un da pyrkhat bha bunsien bunsien halor kane khnang ba kan nym don kano re kano ka jingktah ïa ka jingsngew jong kiba ngeit. Ne ki khun Khristan lada ka Sorkar kan ïaid shakhmat ïa kane ka Tamasa nga tip kan pynmong ïa kiba bun bad kan long ruh ka jingiuh roit ïa ka hok jong kiba ngeit. Ym don jingeh ban pynkylla ïa ka Sngi ne ka Tarik lada don mon ka Sorkar namar nga tip baroh ka shong ha ka mon jong ka Sorkar. Kyntang ïa wai ban pynkut ïa kane ka jingthoh jong nga sa shisien nga kyrpad bad kynti ieit ïa ki khun Samla ka bri u hynñiew trep khamtam ïa ki khun Samla Khristan jong ka Balang to ngi bishar ïa kiei kiei ioh ngin shah rong lute noh ha kane ka Pyrthei lyngba ka jingstad u Soitan uba long u Syiem ka jingdum. Nga kynti ruh ïa phi ki Nongpule baieit ba shim ia kane ka jingthoh jongn nga kum ka jingai jingmut bad symboh pyrkhat. Ngam don kano kano ka jingmut ban pynmong ïano ïano ne ban ktah mat iong na bynta jong phi hynrei nga shu pynpaw ïa ka jingsngew jong nga shimet.
