Nashville, Naiwieng:
Kawei ka khynnah pule 18 snem ka rta jong ka United States, ka la khlad noh hadien ba uwei u kuli u la leit dei bakla na ki bynta jong ka khlieh ha ka por ba ka dang iaid lynti najan ka Nashville. Katkum ka kaiphod ba la ioh lum da ka Metro Nashville Police Department, la ong ba katei ka jingjia ka la jia ha ka Sngi Ba-ar. Ia katei ka khynnah pule la ithuh kum ka Jullian Ludwig, bad ha katei ka sngi ka dang iaid lyngba ia ka lynti na Edgehill Community Memorial Gardens Park ha kaba utei u kuli u la leit her bakla sha ka katba ka dang iaid na katei ka jaka.
Ka samla Ludwig, ka long ka khynnah pule jong ka skulbah Belmont University kaba don hi hapoh Nashville. Hadien katei ka jingjia la pynkit noh sha ka jaka sumar ha kaba don ha katei nongbah na ka bynta ki sumar bniah bad la ong ba katei ka samla ka la mynsaw jur bha na katei ka jingksam u kuli na ki bynta ka khlieh.
Katkum ka khubor na katei ka tnat pulit, la ong ba ka samla Ludwig ha katei ka sngi tang mar ia riew ha utei u kuli, ka la kyllon iapler hajuh bad kaba sngewsih ka long ba ym shym la don ba iohi ne lap mar ia dep katei ka jingjia. Kumta hadien kumba 1 kynta tam la don ki ‘riew paidbah kiba iaid lynti na katei ka jaka bad kiba la lap ba ka thiah lyngktar ha katei ka jaka bad mar kumta hi la pyntip sha ki pulit bad ki pulit ki la phah noh mar-mar ia ka kali kit nongpang ha kaba la pynit ia ka sha ka jaka sumar ha Vanderbilt University Medical Center.
Haba iadei bad kane ka jingjia, ki pulit ki la ioh bat noh ia uwei u suba don kti ha katei ka kam bad uba la ithuh kum u Shaquille Taylor, 29 snem ka rta. La ong ba utei u nongsiat ha katei ka jingjia, u thmu ban siat ia kawei ka kli hynrei utei u kuli u la leit her bakla pynban sha katei ka phang ba katei ka khynnah ka dang iaid lynti.
U Taylor u la shah pynngat noh ha ki katto- katne tylli ki kyndon pynkheiñ aiñ kiba iadei bad ka jingpyniap briew, ka jing pynmynsaw bad ka jing wanrah jingma ia ki paidbah.
Ia mynta hi, u Taylor u don ruh ia ka bai bah jamin kaba $2,80,000 haba iadei bad katei ka kam pynkheiñ aiñ jong u.
U President jong katei ka skul bah, u la iathuh ba ka samla Ludwig ka long ka ‘riew ieid sur jingrwai ‘Music Lover’ bad ka long ruh ka nong mareh kaba smat ba sting bha hynrei la ju kham ithuh pyrthei ia ka dei na ka put ka tem jongka ha ki concert bad ka long ruh ka nong-ai mynsiem ia kiba bun ki paidbah ha kylleng sawdong jongka namar katei ka sam rwai-sap tem ba ka don.
Kumta, utei u nong-ialam jong katei ka skul bah u la ong ruh ba kum kine ki jingjia, ki long ka jingma kaba khraw ia ki paidbah bad ki mynsiem ba lui-lui kum kane ka samla kaba ngat ha kum katei ka jingjia ha kane ka por.
