Shillong, Naiwieng 12
Ka hat-trick ba la ïoh da u Kylian Mbappe ha ka jingïakhun pyrshah ïa ka Reims ka la pynlong ïa ka Paris St-Germain (PSG) ban kiew sha ka kyrdan kaba nyngkong ha ka miej ïakheiñ point jong ka lympung Ligue 1 ha France.
Haba phai sha ka jingïalehkai, ka PSG ka la lah ban pynliem noh ïa ka Reims da 3-0 kol. Ïa kine ki kol u Mbappe u la ïoh ban khyrwit ha ka minit ba 3, 59 bad 82.
Lyngba kane ka jingjop, ka PSG ka la ïoh ban kamai 27 point na ki 12 tylli ki jingïalehkai bad don ha ka kyrdan kaba nyngkong, katba ka Reims pat ka dang ïoh khur 20 point na ki 12 tylli ki jingïalehkai bad ban don ha ka kyrdan kaba saw.
Wat la ka Reims ka la shah liem da 3 kol, hynrei haba phai sha ka jingïalehkai, la sakhi ba ka la lah ban ïalehkai bha bad kaba la buh jingeh shi katdei ruh ïa nongap kol jong ka PSG hynrei namar bym thaw ka bok, kim shym la lah ban ïoh pynkhih jar watla ki la ïoh katto katne tylli ki kabu kiba biang bha.
