Gaza, Naiwieng:
Ka tnat ka koit ka khiah jong ka Sorkar Hamas ha ka Sngi Thohdieng, ka la pynbna ia ka jingkheiñ na ka kaiphod ba la ioh lum jingkheiñ thymmai halor ka jingdon jong kiba khlad na ka jingleit hiar thma ka Israel pyrshah ia ka Gaza. Katkum katei ka kaiphod kaba thymmai, la ong ba ka jingdon kiba khlad na ka thma Israel hapoh Gaza ka la kot sha 11,078 ngut ki nong Palestine kiba shong hapoh Gaza bad kiba la duh ei noh la ka jingim naduh ba sdang ka thma ka Israel bad ki lehnoh Hamas mynta la kumba 5 taiew kynthih.
Kitei kiba khlad ki kynthup ruh ia kumba 4,506 ngut ki khyllung- ki khynnah. Katba ki don ruh kumba 27,490 ngut kiba la ngat bad mynsaw na katei ka jing-iakhun thma jong ka Israel pyrshah ia ki lehnoh Hamas kiba don hapoh Gaza jong ka ri Palestine.
Ka thma hapdeng ki lehnoh Hamas bad ka Israel, ka la sdang naduh ka 7 tarik jong u Risaw ba la leit hadien ba ki lehnoh Hamas ki la sdang ban leit thombor hi ia ka Israel da kaba ther dusmon da ki spah tylli ki ‘namding shisien ther sha Israel. Nangta ki la leit ruh ban hiar thma bad pyniap naphang ia ki paidbah nongshong shnong ha khappud ka Israel. Nalor kata, kitei ki lehnoh Hamas ki la rahbor ruh ia kuma 240 ngut ki briew na Israel ha katei ka por ba ki sdang ban leit hiar thma hi ia ka Israel.
Namarkata, la ong ba dei kane ka daw kaba la pynkhie bitar ia ka Israel, ha kaba ka Israel ka la smai ban pynhiar kput ia kitei ki lehnoh naka bynta kito ki mynsiem ba lui-lui ba ka la duh ei noh namar ka kam dusmon jong kitei ki lehnoh Hamas jong ka ri Palestine.
Kane ka thma hapdeng ka Israel bad ki lehnoh hamas, ka la wanrah ruh ia ka jingsngew khia na kiba bun ki ri bad ki tnat bapher jong ka pyrthei namar ka Israel ka la pynhiar kput ia ka Gaza khlem pyrkhat shuh pat ia ki mynsiem briew kiba lui-lui kiba don hapoh Gaza.
Kumjuh ruh ka Iran bad kiwei de ki ri Muslim, ki la maham bad byrngem jur ia ka Israel ba lada kam pynkut noh ia kane ka thma, kin pynher bad pynpur ia ka thma wat sha kiwei ruh ki ri naka bynta ban ai jingkyrshan ia ki lehnoh Hamas.
