Shillong, Naiwieng 12
Lai ngut ki ‘thei ïalehkai kriket jong ka Meghalaya ki la shah jied na ka bynta ban mihkhmat ïa ka kynhun jong ka North East Zone ha ka lympung Senior Women’s Inter-Zonal T20 Trophy 2023, ka ban long hapdeng ka 24 tarik Naiwieng haduh 4 tarik Nohprah mynta u snem.
Ha kaba ïadei bad kane, ka Zonal Selection Committee ka la shong pyrkhat bad ïakren sani kynthup ban peit bniah ïa ka rukom lah ïalehkai jong ki ‘thei ïalehkai ha ki lympung ka BCCI naduh u snem 2022-23 bad 2023-24, khnang ba kin lah ban shim rai bad jied ïa ki 15 tylli ki kyrteng na ka bynta ka thup ïalehkai.
Ïa katei ka lympung Zonal T20 Trophy yn pynlong ha Lucknow, ha kaba ka NE Zone kan ïakhun nyngkong pyrshah ïa ka North Zone.
Ki lai ngut ki ‘thei ïalehkai kriket ka Meghalaya kiba la shah jied ki kynthup ïa ka Riticia Nongbet, Luiza Tamang bad ka Debasmita Dutta kaba la shah jied ruh kum ka Vice Captain jong ka kynhun.
Nalor kitei ki 3 ngut, la jied ruh ïa ka kyrteng jong ka Ajima Sangma ha ka thup jong ki standbys, katba ka Baiahun Mylliemngap ka la shah jied ban long kum ka Manager jong ka kynhun.
Ki kyrteng jong ki ‘thei ïalehkai ka North East ki long ka Nabam Yapu (Arunachal Pradesh), Hao-rungbam Kiran Bala Chanu, Raj-kumari Linthoingabi Devi, Keisham Kalpana Devi (baroh na Manipur), Riticia Nongbet, Luiza Tamang, Debasmita Dutta (na Meghalaya), Lalrinmawii bad PC Vangsangzuali (na Mizoram), Limatola Ao, Senti-lemla Imsong, Jyoti Thapa, Sariba Khan (na Nagaland), Purnimaya Gurung bad Primula Chetri (na Sikkim).
Katba ki kyrteng jong ki ‘thei kiba la pynkhreh lypa ne Standbys ki long ka Koijam Ranjita (Mani-pur), Ajima Sangma (Meghalaya), Vanlalremtluangi (Mizoram), Alemienla (Nagaland) bad Tshering Ongmu Lepcha (Sikkim).
Ki nongïarap ïa ka kynhun pat ki long ka Baiahun Mylliemngap (Meghalaya) kum ka Manager, ka Sonam Palden Bhuta (Sikkim) kum ka Head Coach, Kikam Bhutia (Sikkim) Coach, Wangshila Jamir (Nagaland) Physio, Jasika Karam (Manipur) Strength and Condi-tioning Coach bad na ka liang jong ka BCCI kan sap hah ïa ki Performance Analyst.
Ki jingïakhun kiba ka North East kan ïakhun ha kane ka lympung kata ha ka 24 tarik kan ïakhun pyrshah ïa ka North Zone, ha ka 28 tarik Naiwieng pyrshah ïa ka West Zone, ha ka 30 tarik Naiwieng pyrshah ïa ka South Zone bad ha ka 2 tarik Nohprah pyrshah ïa ka Central Zone.
