Shillong, Naiwieng 13
Ka Royal FC ka la khur ïa ka jingjop ha ka Super League jong ka lympung ïalehkai 4th (L) K. M Diengdoh Memorial Sohra Football League 1st Division ba la pynïaid da ka Sohra Sports Association (SaSA).
Kane ka nam jop ka la wan hadien ba ka la lah ban pynliem noh ïa ka Seng Samla Laitryngew da 4-0 kol ha ka lah sngi U Blei ha madan ïalehkai jong ka Sohra Sports Association kaba don ha Saitsohpen, Sohra.
Ha kane ka jingïakhun baroh ar ki kynhun ki la pyrshang ban ïakhun tyngeh, hynrei ka Royal ka la ïoh ban pynkhih jar nyngkong eh ha ka minit kaba 7 lyngba u Lurstep Khongsit.
Hadien shiteng kynta katei ka kynhun ka la thep biang ïa ka kol kaba ar lyngba u Threat Umdor ha ka minit kaba 30 na ka bynta ban tam 2-0 kol ha ka kylla step.
Ka Royal ka la thep biang ïa ka kol kaba lai ha ka kylla miet lyngba u Samborlang Langte ha ka minit kaba 51. Hashwa ban wai une u rangïalehkai shakhmat u la pynbud ia ka kol ha ka minit kaba 83 na ka bynta ban khur syndon ïa ka jingjop.
