Shillong, Naiwieng 13
Ka Shillong Lajong FC kan pynkhreh ïa ka jingïakhun kaba ar ha la ïing pyrshah ïa ka Sreenidi Deccan FC na Hyderabad ha ka sngi Ba-ar ha SSA Stadium, Shillong ha ka por 2 baje janmiet.
Kane kan long ka jingïakhun kaba lai ha kane ka lympung hadien ba ka Lajong ka la ïakhaid shabar na la ïing pyrshah ïa ka Mohammedan Sporting da 1-1 kol bad kumjuh ha la ïing ha ka NEROCA (1-1 kol).
Kumba ka paw ka Sreenidi ka dei ka kynhun kaba khlaiñ bor ha kaba ka la lah ban khur jingjop ar sien na ki lai sien ïakhun jong kane ka lympung ha la ïing. Kane ka kynhun kaba na Hyderabd ka la jop ïa ka NEROCA haduh 4-0 kol, kumjuh ïa ka Inter Kashi da 4-1 kol, hynrei ka la shah rem pat ha ka Aizawl FC da 2-1 kol.
U coach ka Shillong Lajong, u Bah Bobby Nongbet u la pynpaw ba ka kynhun jong u kan ïaleh katba lah ban khur ïa ki lai point pyrshah ïa ka Sreenidi FC. “Hadien ba ngi la ïakhaid ha ka jingïakhun pyrshah ïa ka NEROCA, ngi khmih lynti ba ha kane ka kynti kaba mynta ngi khmih lynti ban khur ïa ki lai point ha kane ka jingïa-khun ha la ïing.”
Ha kawei pat ka liang u coach ka Sreenidi u Carlos Vaz Pinto u la ong ba ka kynhun ïalehkai ka jong u ka la long ba la pynkhreh bha na ka bynta kane ka jingïakhun pyrshah ïa ka Lajong. “Ngi la pynkhreh bha na ka bynta kane ka jingïakhun namar ngi la mad ïa ka jingshah rem ha ka jingïalehkai ba la lah. Kam long kaba suk ïa ngi namar ka Lajong ka la ïoh ban ïalehkai ha la ïing hakhmat ki nongkyrshan jong ka.”
Ka Sreenidi ka dei ruh ka kynhun kaba la wan ba-ar ha ka aïom ba la lah, te kumta kan long ka jingïalehkai kaba kham eh ïa ka Lajong ban khur suk ïa ka jingjop.
Ha kaba ïadei bad kane ka jingïakhun ha la ïing, ki bor pynïaid ka Shillong Lajong ki la pynbna ba ïa ki tiket lah ban ïoh na Electronic Centre, Police Bazaar, Cafe Shillong, Laitumkhrah bad na SSA Ticket Counter.
