Gibibi
Kumno ka jaitbynriew Khasi 7 trep ka pyrkhat bad sngewthuh ïa katei ka phang haneng ?
1)Ha kawei ka kot khubor kaba 29th Nailur, 2023, ka seng FKJGP ka pynpaw ïa ka jingpyrshah jur ïa ka jingpynkhuid shnong ha ka tarik 1.10.23 naba ka long ka sngi U Blei. Ka seng ka da maham bad dawa ruh ban weng ïa ka hukum, hynrei haduh mynta la jan dap ar bnai, ki paitbah kim pat tip kaei ka rai jong ka seng ban pynsangeh.
2)Ha kawei ka kot khubor kaba 30.09.23, ka party thymmai VPP (ha u Prah) ka wer ïa ki paid khristan ban kyntait War ban pynkhuid shnong ha ka sngi U Blei 1.10.23 ba la pynbeit da ka sorkar India namar ka ktah ïa ka jingngeit Khristan kiba burom ïa ka sngi U Blei kum ka sngi ban pynlong jingmane Blei.
3)Ha kajuh ka sur, ka HYC ruh ka la kam ba ka Meghalaya ka dei ka Jylla Khristan bad kam dei ka jong ki Hindu ne RSS. Lada ka jylla kam dei ka jong ki Hindu ne RSS, kumno pat sngewhun ïa ka kyrteng “MEGHALAYA” ba la jer da u mynder uba lah ban dei u Hindu ne RSS? Balei ngim pyrshah ïa ka jingpyndonkam Meghalaya Day mynta la palat, ym don seng-bhalang ban dawa ban pynkylla noh ‘Khasi + Garo Land’ kumba long ka Jammu bad Kashmir ?
4)Ha kawei ka kot khubor kaba 18.10.23, ka Stieh ka pyrshah jur ïa ka jingthmu ka sorkar jylla ban pynkut ïa ka Cherry Blossom Festival ha ka sngi U Blei 19.11.23, namarba ka dei ka sngi ba la ñiew kyntang bad kaba long pyrshah ïa ka jingngeit ki Khristan.
5)Kumjuh ruh ha ka kot khubor 20.10.23, ka Joint Action Committee jong 6 tylli ki seng na Ri Bhoi ba la rai ban ïeng tylli ban pynkynriah noh ïa ka tarik pynkut tamasa ba la buh ha ka sngi U Blei. Ka kynhun ka la maham ba lada jia bym pynkynriah noh ïa ka tarik, kin nym ailad satia hynrei kin pyllong da ka jingïakhhih haduh ba ka sorkar kan da pynkynriah ïa ka tarik. Lada mih kano kano ka jingjia ka Sorkar ka dei ban kitkhlieh.
Ym lah ban len ïa ka jingshisha ba ïa ka hukum ban burom ïa ka sngi khuid ym shym la pyrkhing da u Blei. Ka Sabbaton ka long ka jong u Blei shwa ba un thaw ïa u Briew (Adam). U Blei u ai ïa ka Sabbaton ha u briew ban rakhie khuid ïa ka bad ym ban ïa buh sngi ne tarik bad ban ïa pynlong thma ïania kat ban kam kynti ba ka Meghalaya ka dei ka Christian State. Manga kum u khristan Presbyterian nga burom bad sngewsarong ïa ka niam tynrai u 7 trep kaba hikai bad sneng ‘Sarong ïa la ka Jong, Da burom lem ïa ka jong kiwei.’Ki Khristan Sevenday Advestist ki burom sngi khuid ha ka Saturday bad ki Muslim ha ka Friday, hato ynnai burom ïa ki tang namarba ki duna riewngeit. Ki para Khasi Muslim ki la nangbun bad kin nangroi, hato ngin nym kheiñ ïa ki tang namarba ka jylla Meghalaya ka dei ka Christian State. U Jisu Khrist kum u briew um dei u Khristan. Hadien ba u la shah pynïap da kaba shah sdien ha ka Diengphna, ki synran ki la seng ia ka kynhun ban pynphriang ïa ki jinghikai jong u bad la jer kyrteng ïa kata ka kynhun KHRISTAN. U Jisu Khrist kum u briew um shnym shah ïap tang namar ki Khristan hynrei u shah ïap na ka bynta baroh u bynriew ha sla jong ka pyrthei bad ka Baible ka ïathuh Ioannis 3 : 16 – Naba u Blei u la ieit katta katta ïa ka pyrthei, katba u la aiti noh ïa la u khun ba la kha marwei, ba uei uei (Ym dei ka niam) uba ngeit ha u, un nym jot shuh, hynrei un ioh ka jingim bymjukut. Ka nong Samaria kaba im lyngkor, ka ïa taiñia bad u Jisu ka da ong ‘Kumno ma me uba long u Jisu me pan um ban dih nanga kan ong Samaria kaba ïapher ka niam” ka da ong pynksan Ioannis 4 : 20- 21. Ko kynrad, ki kpa jongngi ki la ïa mane Blei halor u Lum Jerisim, phi ki Jew pat phi ïa kam ba ka Jerusalem ka long kaba dei ban mane Blei. U Jisu te u la ïathuh ha ka, ko ka briew, TO NGEIT ïA NGA, ba ka por ka jia bad ka long mynta keiñ, haba ki nongmane Blei KIBA SHISHA kin ïa mane ïa u Blei u kpa ha ka mynsiem bad ha KABA SHISHA naba u Blei ruh u wad ïa kiba kum kita ban ïa mane ïa u.
(Yn dang bteng)
