Marseille, Naiwieng:
Ki bor pyniaid ka nongbah Marseille hapoh France, ki la iathuh ba 2 ngut ki briew kiba dang ha ki 20 snem ka rta ki la shah siat iap ha ka jingsynreit kuli hapoh katei ka nongbah ha ka miet Sngi Saitjaiñ. Katba 3 ngut pat ki la ngat bad mynsaw lang ha katei ka jingjia.
Kitei ki 5 ngut la ong ba ki don hapoh ka kali jongki hajan ka jaka pynieng kali jong ka McDonald ha kaba kynsan katei ka kali ka la shah synreit kuli naphang ha ki runar bad kaba la shim ia ka jingim jong katei ka samla kaba shong hakhmat ha ryngkat bad u nongñiah jong katei ka kali ha katei ka sngi.
Napdeng kitei ki 3 ngut kiba mynsaw, 2 ngut ki dei ki shynrang bad kawei pat ka kynthei bad napdeng jongki, 2 ngut ki dei kiba la mynsaw jur bha.
Baroh 3 ngut ki shynrang kiba don ha katei ka kali ki dei kiba la don dak teng ha ki kam khaïi droks bad kiba la ju ïadon bynta ruh ha ki katto katne ki kam thombor ha katei ka nongbah sha ki bynta jong ka phang South jong ka Toulon. Katba kitei ki 2 ngut pat ki kynthei ki dei ki bym pat ju don dak sniew eiei bad ki pulit.
Kane ka la jia ha ka miet Sngi Saitjaiñ ha ka por kumba 11:00 baje hapoh ka 16 district jong ka Marseille, kaba long ruh kawei na ki thaiñ ba duk tam jong katei ka nongbah ba heh tam hapoh France.
Ki pulit ki dang bud dien bad wad bniah ruh halor katei ka jingsynreit kuli ha katei ka sngi bad la suba ruh ba kitei kiwei pat ki kynhun ruh ki dei hi ki kynhun runar bad ka lah ban long ba kitei kiba shong ha katei ka kali, ki dei kiba la ïadon daw bad kitei kiwei pat ki kynhun kiba leit synreit kuli ha katei ka miet.
Uwei na kitei ki shynrang ba mynsaw, u dei uba la don 29 snem ka rta bad u la mynsaw jur na ka jingshah ksam kuli na ki bynta ka shadem.
ki pulit ki la iathuh ba ki la don haduh kumba 45 ngut ki jingïap na ki jingjia synreit kuli bad jingïakynad hapoh katei ka nongbah tang hapoh jong une u snem 2023.
