New Delhi, Naiwieng:
Ka Israel ha ka Sngi U Blei, ka la kam ba ki shipai jong ka ha ka jing-leit hiar thma bad jingleit tur sha Gaza Strip, ki la ioh kurup ia shibun ki tiar siat, tiar pynbthei bad ki kuli na kawei ka skul Kindergarten kaba don hapoh Gaza. Ki shipai ka Israel ki la iathuh ruh ba ki lehnoh Hamas ki la pyndonkam ia katei ka skul ban buhrieh ia kitei ki tiar thma bad ban ioh pyndonkam ia ki ha ka por ba donkam.
Haba ai jingkren sha ki paidbah hapoh X (Twitter), uwei u shipai ka Israel u la iathuh ba ki shipai Israel ki la lap ia kitei ki tiar thma na katei ka skul katba ki dang leit ban khynra bad ban leit hiar thma ia ki lehnoh Hamas hapoh Gaza.
Ka IDF ka la pyntip shuh shuh ruh ba ki shipai ki la ioh kurup noh ia shibun bah kiwei de ki tiar jong ki lehnoh Hamas na katei ka jaka, hadien ba ki la bud dien ia kawei ka krem kaba pynpoi sha katei ka skul Kindergarten napoh khyndew.
Ha kajuh ka por la ong ba ka Israel ka la kyntait ia ka jingkyntu jong ki ri bad ki tnat bapher bapher ban sangeh noh ia ka jingleit hiar thma sha Gaza bad ka Israel ka la leh kum bym patiaw wat ia ka jingkyntu jong ka United States ban sangeh noh shipor ia ka thma khnang ban ioh pynpoi ia ki lad jingiarap bad ki jingdonkam sha ki paid nongshong shnong ka Gaza.
Ka Israel ka la iathuh ruh ba ki lehnoh Hamas wat haduh kine ki sngi ba ka Hamas ka la jan khyllem, hynrei kik dang iai ther ‘namding khah- khah sha ki thaiñ South jong ka Israel, ha kaba palat 1,200 tam ki paidbah nongshong shnong ka Israel ki la duh ei noh la ka jingim bad kumba 240 ngut ki la shah rahbor ha ki lehnoh Hamas naduh kaba sdang jong ka thma.
La ong ba ki bor pyniaid ka Israel ha ka taiew ba la lah, ki la pynthymmai ia ka jingkheiñ ka jingdon ki paidbah Israel kiba khlad ha ka jingther bom ki lehnoh Hamas ha ka 7 tarik u Risaw, na ka 1,400 tam ba ka la pynbna naduh ba sdang ka thma, sha ka 1,200 tam ba la ioh ia ka jingkheiñ kaba beit ha kane ka por.
Kumjuh ruh na ka liang ki bor pyniaid ka Palestine, ki la iathuh ba ka jingdon jong ki paidbah nongshong shnong ka Gaza Strip kiba la khlad noh na ka jingther bom bad jingleit pynhiar kput jong ka Israel ka la poi kumba 11,078 tam bad kumba 40% napdeng jong kitei kiba khlad, ki dei ki khyllung- ki khynnah.
