Nongpoh, Naiwieng 13
Ka Mawlasnai Football Association (MFA) ha ka Lah Sngi U Blei ka la plie ïa ka lympung ïalehkai phutbol kaba heh tam ha ka thaiñ ïa kaba la jer kyrteng da ka E.K Mawlong Memorial Football Trophy 2023.
Kane ka long shi bynta ban pynsahnam ïa uwei na ki nongïalam saiñ hima sima ba radbah uba dei ruh u Myntri Rangbah barim ka Jylla, u Bah E.K Mawlong (Bam Kwai ha Dwar U Blei) halor u synñiang u bynhei sha kane ka thaiñ.
Ïa kane ka lympung la wan ban plie paidbah da u Abhijit Kro, Member of Autonomous Council ka Karbi Anglong Autonomous Council ha ka jingdon ryngkat u khun jong u Bah E.K Mawlong, Bah Andrew W. Lyngdoh, u Bah Eugeneson Lyngdoh, ki nongïalam ka MFA lem bad kiwei kiwei de ki ‘riew rangbah.
Kumban shu pynpaw khyndiat, ïa kane ka lympung ban pynsahnam bad kynmaw burom kyrpang ïa u synñiang u bynhei kiba u Bah E.K Mawlong uba long u nongmih-khmat barim jong ka Umroi konstitwensi, uba la bat ruh kum u Myntri Rangbah ha ka Jylla, u la noh ban kyntiew ïa ka imlang ka sahlang ha ka thaiñ bad ka Jylla hi baroh kawei ha ka por ka jinglong nongmihkhmat bad ki por kiba u dang don ha ka sla pyrthei.
Haba ai jingkren ha kane ka sngi, u Bah Eugeneson Lyngdoh kum uwei na ki khlur ïalehkai phutbol ka Jylla uba la mihkhmat ruh ïa ka ri India ha ki lympung ïalehkai, u la ai khublei ïa ki nongpynïaid jong ka MFA bad paidbah kane ka thaiñ kiba la kynmaw kyrpang ïa ki matti jong u Bah EK Mawlong (Bam Kwai ha Dwar U Blei) halor ka jingnoh synñiang ka jong u sha ka imlang ka sahlang bad ai ruh ka jingkhublei kaba kyrpang ïa ka ïing ka sem jong utei u riewkhraw ka jaidbynriew ba la wan ban mihkhmat da u khun, Bah Andrew W. Lyngdoh ha katei ka sngi.
U Bah Eugeneson u la pynpaw ruh ïa ka jing-sngewkmen ba ka Jylla mynta ka kynti ka la ïoh ban ïakhun ïa ka Santosh Trophy hapoh ka ri da kaba ong ba ka kam ïalehkai phutbol mynta kam dei shuh tang ka jingïalehkai myllen, hynrei ka lad ban kamai kajih ban wanrah ïa ka roi ka par. U la ong ruh ba ka kam ïalehkai ka wanrah ruh ïa ka jingïeid, ka jingïadei bad ka jingroi hapdeng ka jinglong jingman jong ki briew ha ka imlang ka sahlang.
Ha kane ka sngi, la ïoh ruh ïa ka jingkren na u khun jong u Bah E.K Mawlong, uba nyngkong eh u la pynpaw ïa ka jing-ainguh kyrpang ïa nongbuh nongthaw bad ka jing-aikhublei bad jingsngewnguh ïa ki paidbah ka thaiñ bad khamtam eh ïa ka MFA kiba la kynmaw kyrpang ïa u kpa jong u lem bad ki matti ki jong u.
U la pynpaw ruh ïa ka jingsngewkmen ban poi sha katei ka shnong kaba u kpa jong u, u la shakri hashwa ba un khlad noh 15 snem tam mynshwa na ka sla pyrthei, ban kynmaw ïa ki por kiba u ju wan ban synran ïa la u kpa sha katei ka thaiñ bad kiwei de ki shnong kiba hap hapoh ka Umroi konstitwensi.
U Bah Andrew u la pynpaw ruh ïa ka jingsngewnguh na ka liang ka ïing ka sem bad kiba ïeid ba thoiñ baroh halor ka jinglah ban pynlong ïa kane ka lympung ban pynsah jingkynmaw ïa u kpa jong u, da kaba ong ba kum ka ïing ka sem, ka sngew dap ram bad kim lah ban siew kylliang ïa ka jinglehbha ka jong ki paidbah ïa ka ïing ka sem bad ïa u kpa u jong, uba dei lyngba ka jingïeid bad ka jingkyrshan ka jong ki ba u kpa jong u, u lah ban long kum u MDC, MLA bad poi ruh shaduh ka kyrdan Myntri Rangbah ha ka por ba u dang don ha ka sla pyrthei.
Ha kane ka lympung, kin don haduh 16 tylli ki kynhun na kylleng ka jylla kiban wan ban ïashim bynta ba kynthup ïa 3 tylli na ka jylla Assam. Ha kane ka sngi sdang la ïakhun nyngkong hapdeng ka Khliehmaw-lieh Youth Club pyrshah ïa ka Hills United na Diphu, Karbi Anglong.
Ka jingïakhun ka la long kaba shongshit bad ïakhaid bha naba baroh ar tylli ki kynhun ki la ïaleh ban sei ïala ki sap ki phong. Hynrei haduh kaba kut kaj jingïalehkai kine ki kynhun ki la ïakhaid mar 3-3 kol. Te kumta ha ka jingïashut tie-breaker ka Hills United ka la tam da 4-2 kol ïa ka Khliehmawlieh.
Kum ban shu pyntip khyndiat, ka lahduh ha kane ka lympung kan ïoh ban rah ïa ka song pisa kaba T. 2 lak, katba kaba wan ba-ar pat kan ïoh rah ïa ka song pisa kaba T. 1 lak ryngkat ki Trophy nalor kiwei de ki khusnam shimet.
