Shillong, Naiwieng 13
Ka Rangdajied United Football Club ka la khur ïa ka jingjop kaba nyngkong ha ka lympung ïalehkai I-League 3 (Third Division) ba la pynlong da ka All India Football Federation (AIFF).
Kane ka nam jop ka la wan urlong hadien ba lah ban pynjem khnap ïa ka Millat FC (Maharashtra) haduh 5-0 kol. U Owanijuh Pajuh, u la ïoh ban thep ar kol ha kane jingïakhun ba long ha ka Lah Sngi U Blei ha madan ïalehkai jong ka Dempo Academy kaba ha Goa.
Ka jingleit ïashim bynta katei ka kynhun ïalehkai na nongbah sha katei ka lympung ka long hadien ba ka la rah ïa ka nam lahduh ha ka Meghalaya State League mynta u snem ba la pynlong da ka Meghalaya Football Association. Kat kum ki kyndon aiñ ïalehkai ba thymmai jong ka AIFF la ong ba ki lahduh na ki jylla bapher bapher jong ka ri ki ïoh rung sha ka Third Division.
Ha kane ka jingïakhun, ka Rangdajied hapoh ka jingïalam u Subir Dey ka la ïakhun tyngeh naduh kaba sdang ha kaba u Owanijuh u la ïoh ban pynkhih jar nyngkong eh ha ka minit kaba 16. Hadien shiteng kynta utei u rangïalehkai shakhmat u la pynbud biang ïa ka kol kaba ar ha ka minit kaba 34 na ka bynta ban tam 2-0 kol haduh kaba kut jong ka kylla step.
Hadien ba la bteng ïa ka jingïakhun jong ka kylla miet baroh ar ki kynhun ki la pyrshang ban ïakhun tyngeh. Hynrei ha ka minit kaba 76 ka Rangdajied ka la ïoh ban thep kol biang lyngba u Damehun Syih.
Hashwa ban wan ka RUFC ka la ïoh ban thep biang sa ar kol lyngba u Oresterwel Langshiang (90+2) bad u Stephanson Pale (90+4) na ka bynta ban khur syndon ïa ka jingjop.
Ka Rangdajied kan pynkhreh ïa ka jingïakhun kaba ar pyrshah ïa ka Kickstart na Karnataka ha ka 15 tarik, kumjuh ïa ka Jeppiaar Institute of Technology FC na Pondicherry (19 tarik) bad ïa ka Dempo SC (21 tarik).
