Lahore, Naiwieng:
Katkum ki khubor la ong ba ki don haduh kumba 100 tam ki nongtrei jong ka Tehreek-e-Insaf Party kaba la lam khmat da u Myntri Rangbahduh barim ka Pakistan, kiba la shah kem noh naduh ka por ba mih ka jingïakynad ha ka thaiñ Punjab jong ka Pakistan hapoh ka nongbah Lahore haba iadei bad ka jingshah thombor ki jaka treikam ki shipai ha u Jymmang.
Ka tnat pulit Lahore ka la pyntip ba ki la ioh ban kem haduh 105 ngut ki dkhot ka seng PTI halor ka jingshah thombor ka iing u heh shipai ka Lahore bad Askari Tower kaba la suba ba ka dei jong u khun u heh shipai barim u Gen. Qamar Javed Bajwa.
La ong ba ki pulit ka Pakistan ki dang bud dien ruh ia kumba 1,000 ngut kiwei pat ki dkhot jong ka seng PTI hi kiba ïadon kti ha katei ka jingjia bad kiba dang lait phet tad haduh kane ka kynti.
Ha ka 9 tarik jong u Jymmang, ka la mih ka jingiakhih paidbah kaba la wanrah ia ka jingïakynad, hadien ba ki bor ka aiñ ha Pakistan ki la leit ban kem ia utei u Myntri Rangbahduh barim jong ka Pakistan- u Imran Khan. Dei ha katei ka sngi ba ki dkhot bad ki nongkyrshan jong utei u nongialam ki la mih ban ïakhih paidbah bad ki la leit thombor ruh ia ki jaka treikam jong ki bor pahara, kynthup ia ka Jinnah House (ka iing u heh shipai ka Lahore), ki la leit thombor uh ia ka Mianwali Airbase bad ia ka ïingmala ka ISI hapoh Faisalabad. La ong ruh ba wat ki headquarter jong ki shipai (GHQ) kiba don hapoh Rawalpindi ruh ki la shah thombor ha kitei ki paidbah ha ka sien ba nyngkong eh hapoh ka ri ban ioh mad ia kum katei ka jingjia.
Kumta, la ong ba ki pulit ka Lahore ha ka Sngi Balang jong kane ka taiew ba la lah, ki la ioh kem noh sa ia ki 62 ngut ki nongtrei bad nongkyrshan jong utei u nongialam napoh Lahore.
Katkum ka khubor na ka seng PTI, la iathuh ruh ba kumba 10,000 ngut ki nongialam bad ki dkhot jong katei ka seng ki la dep shah kem bad shah bat naduh u Jymmang jong une u snem khamtam hadien jong katei ka jingïakynad bad ka jingshah thombor ki shlem treikam ki bor pahara.
Na ka liang jong ki nongialam katei ka seng PTI, ki la pynrem jur halor ka jingkem ia ki dkhot ka seng khamtam haba kitei ki jingjia ki ju jia ha kum kitei ki jingiakhih paidbah.
