Jowai, Naiwieng 13
U Symbud Myntri Rangbah ka Jylla, u Bah Sniawbhalang Dhar uba dei ruh u MLA ka Nartiang u la plie ïa ka lympung ïaleh-kai phutbol ba la tip kum ka ‘3rd Sniawbhalang Dhar Football Tourna-ment 2023’ ha ka Lah Sngi U Blei ha madan Mini Stadium Wahïajer.
Ha kane ka lympung ïalehkai la wan ïashim bynta haduh 1830 ngut ki rangïalehkai na ki 61 tylli ki kynhun kiba na ki 72 tylli ki shnong kiba don hapoh ka Nartiang Constituency.
Haba ai jingkren u Bah Sniawbhalang u la ong ïa kane ka lympung ïalehkai la pynlong shisien ha ka 4 snem bad tang ki rangïalehkai kiba napoh ka Nartiang Constituency hi kiba ïoh ïashim bynta ha kane ka lympung.
U la ïathuh ruh ba ka jingthmu ba kongsan ban pynlong ïa kane ka lympung ka long ban kyntiew ïa ka kam ïalehkai phutbol hapoh ka konstitwensi bad ruh ban pyllait ïa ki khun samla ba kin ngop ha kino kino ki kam bymman ki bym ïadei dur bad ka imlang sahlang.
Haba phai sha kam ïalehkai phutbol, u la ong baroh shi katta la tip ïa ka phutbol kum kata ka jingïalehkai ban kilan met khnang ban ïoh ïa ka jingkoit jingkhiah, hynrei kumba ka long mynta ka phutbol bad sports ki dei ka karkhana ne ki lad ïoh kam ïoh jam ban im ja na ka bynta ki samla don sap.
Shuh shuh ha kaba ïadei bad ki rangïalehkai, u la ong ba ki briew ki burom bha ïa ki khamtam sha ki Ri Sepsngi, da kaba u la ïathuh ruh ïa ka jingwan jong u sha Barcelona, Spain bad France ha kine ki ar-lai sngi ba la dep.
U la ong ha kane ka jingleit sha Ri Sepngi u da leit kai khnang sha ïing jong u Kyllian Mbappe bad Lionel Messi, hynrei ha kane ka jingleit ym ïoh wat tang ban jan namar 200 mitre la don ki nongap.
U la ong haduh katta ka pyrthei ka burom ïa ki rangïalehkai, kumta u Symbud Myntri Rangbah u khmih lynti ba ha kawei ka sngi yn don ki rangïalehkai na kane ka thaiñ ki ban mihkhmat ïa ka District, ka Jylla bad sha ka ri bad katno kan long ka jingsngewsarong.
U la kyntu ïa ki rangïalehkai ban long ki nongïaleh ym ki rangïa-lehkai kiba duh jingkyrmen ha kano kano ka jingïaleh.
U Bah Dhar ul a pynbna paidbah ba ïa ka final jong kane ka lympung ka ban long ha u bnai Nohprah 2023, yn pynlong ha madan Wahiajer Sports Complex kaba don hajan kane ka madan Mini Stadium, Wahiajer kaba long ruh kum ka jingplie paidbah ïa ka da u Myntri Rangbah ka Jylla u Conrad K. Sangma.
Ïa u Symbud Myntri Rangbah ka Jylla, la synran da u Chief Executive Member ka JHADC u Bah Thombor Shiwat, u Chairman ka JHADC u Dr. Sankey Shangpung, ki MDC ka JHADC ha ka jingdonlang ki nongkitkam ka West Jaintia District Sports Associa-tion (WJDSA) kiba kynthup ïa Working President u Bah EMH, Passah, u General Secretary u Bah Lammat-o Laloo, u Vice President u Bah Patrick Lamare, ki waheh shnong, ki nongïalam ka NPP napoh ka District bad kiwei kiwei.
Ha kane ka sngi sdang ka jingïakhun ka la long hapdeng ka Larnai pyrshah ïa ka Mynsngat ha kaba ka jingïakhun ka la kut ha ka jingïakhaid khlem da lah ban pynkhih jar.
