London, Naiwieng:
Ki pulit ka London ha ka Sngi Nyngkong ki la iathuh ba 5 ngut ki briew, kynthup ia 3 ngut ki khynnah. Ki la khlad noh ha ka jingkem ding ka iing kaba don ha ka thaiñ West jong ka London hadien ka jingrakhe ia ka ‘Diwali’.
Ia mynta hi ym pat lah ban tip ia ka daw jong ka jingkem ding katei ka iing kaba don ha Hounslow hajan ka Kad Liengsuiñ Heathrow hynrei la shu suba ba dei ka jingthang bom diwali kaba la pynkem ding ia katei ka ding ha katei ka jingjia.
La iathuh ba dei ha ka por kum 10:30 jong ka miet Sngi U Blei ba ka tnat pynlip ding bad ki pulit ki la ioh jingtip halor katei ka jingpluh. Ia ka metiap jong kitei ki 5 ngut kiba la ngeit ba ki long ki dkhot jong kajuh ka iing, la ioh sei napoh jong katei hi ka iing kaba la pluh. Katba uwei pat u briew u la lait phet noh shabar jong katei ka iing hamar ka por ba ki tnat iarap ki la jan poi sha katei ka iing.
La ong ba katei ka iing ha katei hi ka sngi, ka dang leh kmen bad rakhe ia ka jingleh kmen ‘Diwali’ bad kumta ruh katei ka iing ka la thang bad pynher ia ki bom kumba ju leh ha ka ‘Diwali’ hynrei katei ka jingkem ding katei ka iing ka long hadien bun kynta ba ki la sangeh ban thang bom.
Ki pulit ki la iathuh ruh ba katei ka ding ka la bam-duh ia ka mala ba shapoh jong katei ka ïingmala bad ki kynhun pynlip ding ki la lah ban pynlip lut ia katei ka ding haduh ka por 1:25 mynstep.
