Gaza, Naiwieng:
U Heh ka tnat iada jong ka Israel ha ka Sngi Nyngkong, u la ong ba ka Hamas ka la duh ia ka bor synshar hapoh Gaza bad kane ka jingkren jong utei u heh ka long hadien 1 bnai ba ka Israel ka la pynhiar kput ia ki lehnoh Hamas hapoh Gaza.
Ka thma Israel bad ki lehnoh Hamas ka la sdang naduh ka 7 tarik u Risaw ba ki lehnoh Hamas ki la leit ban hiar thma ia ka Israel bad ki la ther dusmon ruh da ki spah tylli ki ‘namding shisien ther ha katei ka sngi bad kaba la shim ia ka jingim jong 1,400 tam ki nong Israel ha katei ka por, ha kaba ka Israel ka la pyntikna ba ka jingdon kiba khlad ha katei ka jingleit hiar thma ka Hamas ha ka 7 tarik ka long kumba 1,200 tam bad ki lehnoh Hamas ki la leit ban mait khlieh bad pyniap dusmon ia ki paidbah nongshong shnong ka Israel haduh ha iing- ha iing bad ki la rahbor ruh ia kumba 240 tam ki briew na Israel, kynthup ia kiba dei na kiwei ruh ki ri nabar ka Israel.
U heh ka tnat ka koit- ka khiah jong ka Hamas hapoh Gaza, u Youssef Abu Rish u la iathuh ruh ba baroh ki hospital kiba don sha ka phang North jong ka Gaza, ki la sangeh treikam lut namar ki jingdonkam baroh ki la lut- lut khoit, ha kaba ki la don kumba 27 ngut ki nongpang kiba thiah ha kitei ki hospital, kynthup ia ki 7 ngut ki khyllung ba la kha khlem dap bnai, kiba la khlad noh ha kine ki khyndiat sngi namar ka jing bym lah shuh ban ioh ia ka jingsumar kaba biang.
