U Nongsaiñ Hima, 1979
Ka jaidbynriew ka ban kiew ka don bad ka pynmih ki Nongïalam kiba kloi ban aiti ïalade na ka bynta ka jingbha, jingroi bad jingiaid shaphrang jong ka jaidbynriew.
Ka jaidbynriew ka ban kiew ka don bad ka pynmih ki Nongïalam kiba iohi jngai bad ïalam ïa u paidbah ka ri lyngba kata ka lynti kaba ki la iohi haduh ban da poi tiap haba thmu. Ki la iohi lypa ba don aiu ha kata ka lynti, la don ki liew lep, ne ki bsein ne kino kino ki jingeh bad kumta ki pynkhreh lypa ban ïa kynduh ia kita ki diengpyngkiang bad hikai ïa u paidbah ban shlur bad ban ym kynran dien.
Ka jaidbynriew ka b an kiew ka don bad ka pynmih ki Nongïalam ki baiaishah, ki bashlur, ki bakloi ban kohnguh. Kim tharai stad ne tip lut ba tang ma ki kiba stad hynrei ki iohi bad sngap ruh ïa ka jingmut jingpyrkhat jong kiwei pat. Ka jaidbynriew ka ban kiew ka don lad bad ka pynmih ki Nongïalam kiba pyndep hok ïa la ki kamram jong ki kiba man la ka sngi – kine ki kynthup ïa ki kamram kiba ïadei ïalade shimet, ki kamram kiba ïadei bad la ka ïing ka sem, ki kamram kiba ïadei bad la ki para marjan marpa bad ki kamram kiba ïadei bad la U Trai Nongthaw.
Kum ha kata ka jaidbynriew ka don ki ïing ki sem kiba bha. Wei haba la don kum kita ki ïing ki sem khlem pep kita ki ïing ki sem ki long ka SHLEM kiba saiñ dur ïa kita ki ban long ki rishot jong ka ri bad ka jaitbynriew. Kum ha kata ka ïing, la khein kor ïa ki khyllung ki khynnah ba kin san ha ka akor ka jingkohnguh, ka jingnang jingstad, ka jingsngew rit, ka jingpyndep hok ïa la ki kamram. Kum ha kata ka ïing khlem pep kita ki khynnah rit kynthei bad shynrang kin san ym tang ha ka met kumjuh ha ka mynsiem kaba khlaiñ bad ban tip ïa la U Nongthaw. Ym don ka skul kaba kham bha ban ïa la ka ïing ka sem ha kaba u kpa bad ka kmie ki long ki nuksa kiba im bad bym ju lip, bad dei hangne ruh la hikai ïa ki ïa ka jingkohnguh, jingsngewrit, jingbat ïa ka por, ka jingïaishah, ka jingsngewthuh ia ki jingeh jong kiwei, ka jingïatreilang ban pyndep ïa ki kamram kiba dei jong kata ka ïing bad ka jingsheptieng ïa la u Trai Nongthaw.
Phi tharai kum kata ka jaidbynriew kaba don kum kita ki ïing, dang lah ban don ka jingsheptieng ba kum kata ka jaidbynriew kan ym ïaid shaphrang bad ba kan ym lah ban pynmih kum kita ki nongialam kiba kloi ban aiti ïalade na ka bynta ka jingbha, jingroi bad jingïaid shaphrang jong ka jaidbynriew ?
