Shillong, Naiwieng 14
Ka Seng Samla Mawmluh ka la pynliem noh ïa ka Ïaphyrnai S&YA (Mawjrong) da 2-1 kol na ka bynta ban khur ïa ka jingjop ha ka Super League jong ka lympung ïalehkai 4th (L) K. M Diengdoh Memorial Sohra Football League 1st Division ba la pynïaid da ka Sohra Sports Association (SaSA).
Ha kane ka jingïakhun kaba la long ha ka sngi Ba-ar ha madan ïalehkai jong ka Sohra Sports Association kaba don ha Saitsohpen, Sohra, ka Seng Samla Mawmluh ka la ïoh ban pynkhih jar nyngkong eh lyngba u Damutskhem Thabah ha ka minit kaba 20. Hadien khyndai minit ka Ïaiphyrnai ka la pynphai kylla lyngba u Banlam Kharakor na ka bynta ban ïakhaid mar shi kol.
Hadien katto katne por ka Seng Samla Mawmluh ka la ïoh ban thep biang shi kol lyngba u Arki Nongrum ha ka minit kaba 39. Haduh kaba kut ka jingïalehkai ka Ïaiphyrnai kam shym la lah shuh ban pynphai bad ka la mad ïa ka jingshah rem.
Ka jingïalehkai ha ka sngi Balang kan long hapdeng ka Seng Samla Mawmluh pyrshah ïa ka Seng Samla Laitryngew.
