Shillong, Naiwieng 14
Ka kynhun ïalehkai ka ri kan pynkhreh ïa ka jingïakhun semi final kaba saw ha ka ODI Cricket World Cup da ka jing ïakhun pyrshah ïa ka New Zealand ha ka sngi Balang ha Wankhede Stadium kaba ha Mumbai.
Ka India ka la ïoh rung sha ka semi-final haduh phra sien na ki 13 sien ïakhun ha ka ODI World Cup (1983, 1987, 1996, 2003, 2011, 2015, 2019 & 2023). Na ki hynñiew sien ki jingïakhun semi final kiba ka India ka la ïakhun, kane ka kynhun ka la khur ïa ka jingjop lai sien bad shah rem saw sien.
Ha ka World Cup 1983, ka India ka la jop ïa ka England ha ka semi-final bad ka la khur ruh ïa ka nam lahduh. Ha u snem 1987, ka India hapoh ka jingïalam u Kapil Dev ka la mad ïa ka jingshah rem ha ka England ha ka semi final kaba la long ha Wankhede. Sa shisien pat kine ki kynhun ki la ïakynduh biang ha ka semi final ha World Cup 1992, ha kaba ka India ba la lamkhmat da u Mohammed Azharuddin kum u kapten ka la shah rem da ka said ha ka England.
Ha ka semi final kaba la long ha 1996 ha Eden Gardens, ka India ka la ïakynduh pyrshah ïa ka Sri Lanka. Hynrei ïa kane ka jingïalehkai la hap ban pynsangeh na ka daw ka jingmih ki kynrum kynram hapdeng ki paidbah, kumta ka la pynlong ïa ka India ban mad ïa ka jingshah rem. Hadien ba ka la duh rung semi-finals ha u 1999 World Cup, ka India ka la ïoh rung sha ka semi final ha u 2003. Kane ka kynhun ba la lamkhmat da u Sourav Ganguly ka la lah ban pynliem ïa ka Kenya na ka bynta ban jam sha ka final.
Ha ka World Cup 2011, ka India ka la ïakynduh pyrshah ïa ka Pakistan ha ka semi-final bad kane ka kynhun hapoh ka jingïalam da u MS Dhoni ka la jop da 29-run. Hadien kane, ka India ka la mad ïa ka jingshah rem ha ki jingïakhun semi-final ha ka World Cup kaba la long ha u snem 2015 & 2019 ha ka Australia bad New Zealand.
Kumba ka paw ka India bad ka New Zealand ka la khur ïa ki rekod ha ka ICC World Cup. Kane ka kynhun ïalehka ka ri ka la ïakynduh pyrshah ïa katei ka kynhun haduh shiphew sien ha ka ODI World Cup, ha kaba ka India ka la jop saw sien bad shah rem san sien, katba kawei pat ka jingïakhun ka dei kim shym la lah ban khur jingjop.
Kine ki kynhun ki la ïakynduh semi final ha ka World Cup 2019, ha kaba la India ka la shah rem da 18 run. Hynrei ka India ka la lah ban pynliem ïa ka New Zealand ha ka ODI World Cup 2023.
