Shillong, Naiwieng 14
U Virat Kohli uba la don ha ka rekod kaba hakhlieh hadien ba u la lah ban pynïaryngkat kyrdan bad u khlur ïalehkai barim u Sachin Tendulkar ha ka jinglah ban kot ïa ki spah run kaba 49 ha jingïalehkai jong ka one-day international, une u khlur ïalehkai ka ri un pynkhreh ban kynjoh sha uwei pat u maw jam ha ka kam ïalehkai jong u.
U Virat, uba la lah ban tied bun run ha ka ICC ODI World Cup, u la pynkhreh ban knieh ïa ka rekod jong u kapten ka Australia u Ricky Ponting namar une u long u rangïalehkai uba la lah ban kamai bun run ha ki jingïalehkai World Cup.
U Virat, uba la ïoh ban ïalehkai saw sien ha ka World Cup, u la lah ban kamai 1624 run ha ki 35 sien ïakhun, kynthup ia saw sien ki jinglah ban kamai ïa ki spah run bad 11 sien ïa ka shiteng spah run.
U Ponting u la lah ban kamai 1743 run ha ki 46 sien ïakhun. Une u khlur nongtied ba kynsai ka Australia u la long uba kynsai ha ki jingïakhun jong ka World Cup.
U Tendulkar u la bat ïa ka kyrdan ba hakhlieh ha kaba u la lah ban kamai 2278 run ha ki 45 sien ïakhun ha ka World Cup.
Lada u Virat u lah ban kamai 120 run ha ka semi final pyrshah ïa ka New Zealand, un knieh noh ïa ka rekod ba la bat da u Ponting (1743 run) bad un long uba ar ban kamai bun run ha ka World Cup.
