Shillong, Naiwieng 14
Ka Shillong Lajong FC ka la mad biang ïa ka jingïakhaid ha ka sien balai jong ka lympung ïalehkai I-League ha jingïakhun pyrshah bad ka Sreenidi Deccan kaba na Hyderabad ha ka sngi Ba-ar ha SSA Stadium, Polo.
Kane ka jinglah ban pynïakhaid katei ka kynhun na Hyderabad ka la wan urlong lyngba u Rosenberg Gabriel uba la ïoh ban thep ar kol bad ban khur ruh ïa ka nam Player of the Match.
Ha kane ka jingïakhun baroh ar kynhun ki la pyrshang ban ïakhun tyng -eh naduh kaba sdang, hynrei ka Sreenidi ka la ïoh pynkhih jar nyngkong eh lyngba u Gabriel ha ka minit kaba 7.
Kane ka shi kol ka la nangpynïoh mynsiem ïa katei ka kynhun ïalehkai na Hyderabad ban ïakhun tyngeh shuh shuh, hynrei ka Lajong ka la lah ban pynphai kylla ha ka minit kaba 28 lyngba u Ronney Willson Kharbudon, uba la ïoh ban pyndei da ka khlieh hapoh ka box lyngba ka free-kick.
Ka Lajong hapoh ka jingïalam u Bah Bobby L. Nongbet ka la pynbud biang ïa ka kol kaba ar hadien shiteng kynta lyngba u Takuto Miki ha ka minit kaba 34 na ka bynta ban tam 2-1 kol ha ka kylla step.
Hadien katto katne por ba la bteng ïa ka jingïakhun jong ka kylla miet, u Gabriel u la ïoh ban thep biang ïa ka kol kaba ar ha ka minit kaba 63 na ka bynta ban ïakhaid mar ar kol.
Wat la kine ki kynhun ki la pyrshang ban ïakhun tyngeh na ka bynta ban ïoh thep kol, hynrei kim shym la lah ban pynurlong bad ka jingïalehkai ka la kut hapdeng jingïakhaid.
Lyngba kane ka jingïa-khaid ka la pynlong ïa ka Sreenidi ban kamai 7 point na ki saw sien ïakhun, katba ka Lajong ka la kamai 3 point na ki lai sien ïakhun.
