Nongstoiñ, Naiwieng 14
Ka Nongstoiñ District Sports Association ka la pynhap pyrda noh ïa ka lympung ïalehkai 3rd bad 2nd Division NDSA League Football Tourna-ment 2023-24 ha ka sngi Ba-ar.
Ka Dommawlien FC ka la khur nam lahduh ha ka 3rd Division bad ka Nonglwai SC ha ka 2nd Division myna ka aïom.
Ka nam tam jong ka Dommawlien FC ha ka 3rd Division ka dei hadien ba ka la lah ban pynliem noh ïa ka Tiehsyniangoiñ FC da 3-2 kol lyngba ka tie-breaker hadien ba ïakhaid da mar shi kol ha madan NDSA kaba ha Nongpyndeng.
Katba ka nam jop jong ka Nonglwai SC ha ka 2nd Division ruh ka la wan hadien ba ka la lah ban pynliem noh ïa ka Langpih SC da 3-2 kol lyngba ka tie-breaker hadien ba ïakhaid da mar shi kol ha ka jingïakhun final kaba la long ha kajuh ka sngi kaba la long shisha kaba itynnad.
Ha katei ka sngi ha ka 3rd Division ïa ka nam Top scorer la ïoh da u Wilfred Nongsiang na ka Tiehsyniangoiñ, Emerging Players la ïoh ban khur da u Mark Richard na ka Dommaw-lien, Best Goalkeeper la ïoh ban khur da u Shaikupar Sangriang na ka Mawthaw katba ïa ka nam best player la ïoh ban khur da u Rispoljohn Dkhar na ka Tiehsyniangoiñ.
Ha ka 2nd Division pat ïa ka namTop scorer la ïoh ban khur da u Pyrkhatsuklang Jyndiang na ka Nonglwai, Emer-ging Players la ïoh ban khur da u Bankit Sang-riang na ka Langpih, Best Players ka leit sha u Hugerobertklyn Tympuiñ na ka Nonglwai katba ïa ka nam Best Goalkeeper la ïoh ban khur da u Shem Myrthong na ka Langpih.
Shuh shuh ha katei ka sngi pynhap pyrda ïa katei ka lympung jong kitei ki ar tylli ki kyrdan ïalehkai, la ïadon langruh ki nongkitkam ka NDSA, ki nongkitkam na ka Football Committee bad kiwei kiwei kiba la sam ruh ïa ki khusnam sha ki kynhun ki ba la poi sha ka final ,kumjuh ïa ki khusnam ba kyrpang.
Na ka liang ka NDSA ka la pyntip ruh ba ïa ka lympung ïalehkai jong ka Super Division yn plie pyrda mynta ka sngi Balang (15 tarik) ha ka por 1baje ha kaba ka kynhun ïalehkai jong ka Pyndengrei SCSC kan ïakhun pyrshah ïa ka Mawlarshong SC.
