Shillong, Naiwieng 14
Ka kynhun ki ‘thei ïalehkai ka Jylla ka la mad biang ïa ka jingshah rem kaba ar ha ka lympung ïalehkai 28th Senior Women’s National Football Championship 2023-24, hadien ba ka la shah pynliem noh ha ka Gujarat da 2-0 kol ha ka Sngi Ba-ar ha Sundargarh, Odisha.
Kane ka kynhun ïalehkai ka Jylla hapoh ka jingïalam ka Kong Ïaikyntiew Nongkynrih kaba la shah rem ha ka jingïalehkai kaba nyngkong jong ka Group-E ha ka Odisha da 3-1 kol, kam shym la lah ban ïalehkai bha ha kane ka jingïakhun kaba ar.
Te kumta tang mar ïasdang ka jingïalehkai, ka Meghalaya ka la shah thep shi kol lyngba ka Anjanaben Thakor ha ka minit kaba 4. Hadien shiteng kynta, ka Meghalaya ka la shah thep biang ïa ka kol kaba ar lyngba u Shilpaben Devabhai Thakor ha ka minit kaba 33 na ka bynta ban tam ar kol haduh kaba kut jong ka kylla step.
Wat la ka kynhun ïalehkai ka Jylla ka la pyrshang ban pynphai ha ka kylla miet, hynrei kam shym la lah ban pynurlong bad ka la mad ïa ka jingshah rem ha ka Gujarat.
Ka Meghalaya kan pynkhreh ïa ka jingïakhun kaba lai pyrshah ïa ka Arunachal Pradesh ha ka 16 tarik.
