Khliehriat, Naiwieng 15
U Barland Syngkon marwei u la khyrwit haduh 9 kol ban pynlong ïa ka Old Star FC ba kan khur jingjop ha ka lympung ïalehkai 1st Open to All Veteran Football Tournament ba la pyniaid da ka East Jaiñtia Hills District Football Association (EJHDFA).
Kane ka la wan hadien ba ka Old Star FC ka la pynliem haduh 14-0 kol ïa ka Rymbai Synrang Shahkhaiñ ha ka sngi Balang ha madan Artificial Turf Diengshynrum, Khliehriat.
Nalor ki 9 tylli ki kol ba la thep da u Barland Syngkon, u Genesis Bareh, Synod Nongtdu, Embhahlang Wet, Thrangki Laloo bad Biky Ryngkhlem ki la ïoh thep mar shi kol.
Haba phai sha ka jingïalehkai kaba bud hapdeng ka Border Area bad Daloi FC ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.
