Shillong, Naiwieng 13
Ka Rangdajied United Football Club ka la ïasam mar shi point ha ka jingïakhun pyrshah ïa ka Kickstart na Karnataka ha ka lympung ïalehkai I-League 3 (Third Division) ba la pynlong da ka All India Football Federation (AIFF).
Kane ka la wan hadien ba ki la ïakhaid mar 1-1 kol ha ka sngi Balang ha madan shlem ai jinghikai jong ka Dempo kaba ha Goa.
Watla ka Rangdajied ka la khur ïa ka jingjop ïa ka Millat FC (Maharashtra) da 5-0 kol ha ka jingïalehkai kaba nyngkong, hynrei ha kane ka jingïakhun ka la shem jingeh bad tang mar ïasdang ka jingïalehkai ka la shah thep kol nyngkong ha ka Kickstart lyngba u Abhishekh Shankar Powar ha ka minit kaba 3.
Kane ka shi kol ka la nangpynïoh mynsiem ïa katei ka kynhun kaba na Karnataka ban ïakhun tyngeh. Ka Rangdajied kam shym la duh mynsiem ha kaba ka la ïakhun tyngeh shuh shuh bad dei hashwa ban kut ka jingïalehkai jong ka kylla step ba ka la lah ban pynphai kylla lyngba ka penalty ba la shut da u Alanki Nongsieh ha ka minit kaba 42. Ka jingïoh ïa kane ka penalty ka la wan hadien ba u katep ka Kickstart u Reign M u la pynur ïa u Ïeitlang Syiemlieh hapoh ‘box’ bad dei hangne ba u Alanki um shym la pynlehnohei ïa kane ka kabu ksiar na ka bynta ban ïakhaid mar shi kol ha ka kylla step.
Hadien katto katne por ba la bteng ïa ka jingïakhun jong ka kylla miet, ka Rangdajied ka la pynbud biang ïa ka kol kaba ar lyngba u Ïeitlang, uba la ïoh ban pyndei da ka khlieh ïa ka bol ha ka free-kick ba la shut da u kapten u Knerktilang Buam ha ka mint kaba 56.
Watla ka Rangdajied ka la tam shu kol, hynrei ki rangïalehkai ka Kickstart ki la pyrshang ban ïakhun tyngeh bad dei ha ka minit kaba 68 ba ka la ïoh ban pynphai kylla shi kol lyngba u Kharngam Horam na ka bynta ban ïakhaid mar ar kol.
Hashwa ban wai kine ki kynhun ki la pyrshang ban ïakhun tyngeh na ka bynta ban khur ïa ki lai point, hynrei haduh kaba kut kum kim shym la lah ban pynurlong bad kut ha ka jingïakhaid.
Ka Rangdajied kan pynkhreh ïa ka jingïakhun kaba lai pyrshah ïa ka Jeppiaar Institute of Technology FC na Pondicherry ha ka 19 tarik bad ïa ka Dempo SC ha ka 21 tarik mynta u bnai.
