Geneva, Naiwieng:
Wat hapdeng ka jingïakynad bad ka Canada ha kine ki sngi, la ong ba ka India ka la kyntu ia ka Canada ba ka dei ban khmih bniah ia ka jinglong-jingman hapoh ka ri bad ba kan ialeh ban ai jingiada ia ki jingma kiba ap na ka jingshah thombor jong ki jaka mane jong ki jaitbynriew Hindu na India. Ka India ka la kren ia kane hapoh ka jingialang UN Human Rights Council Review, ha kaba ki heh na India, Bangladesh bad ki jong ka Sri Lanka ki la pynpaw ia la ki jong ki jingsngew bad ki jingai jingmut.
Hynrei u Myntri ka India- u Mohammed Hussain ha ka por ba u ai jingkren sha katei ka jingialang, u la kren da kaba pyndonkam bad shim na ki kyndon aiñ kum ka National Housing Strategy Act bad ka Accessible Canada Act.
Namar u la Hussain u la ong ruh ba lada pyntreikam ia kitei ki kyndon National Housing Strategy Act bad ka Accessible Canada Act kin iarap ban tehlakam ia ka jingpynrung be-aiñ bad ka jingpyntrei beiñ ia ki phetwir.
Kumta ka India ka la kyntu ia ka Canada ba kan pyntreikam hok ia ki kyndon ba la buh khnang ban tehlakam ia ki jingjia thombor bad ki jingïakynad jaitbynriew hapoh ka ri. Ha kajuh ka por ka India ka la kyntu ia ka Canada ba kan ialeh ban pynduh bad ban tehlakam ia ki kam thombor jong ki kynhun runar bad ban iada ruh na ki jingjia kum ka jingshah thombor ki jaka mane bad ki jaka ba kyntang jong ki jaitbynriew rit paid kiba don hapoh jong ka ri Canada.
Kumjuh ruh u Myntri jong ka Bangladesh pat, u Abdullah Al Forhad, u la kyntu ia ka Canada ba kan ialeh ban tehlakam ia ka jingpynrung bad jingpyntrei be-aiñ ia ki phetwir na Bangladesh.
Kumba la iohi ia ka jinglong- jingman ha kine ki sngi, ka jingiadei hapdeng ka India bad ka ri Canada ka la sdang ban tlor bun shah. Watla katta, u nongialam ka Canada- u Justin Trudeau u la pynpaw ba ka Canada ka kwah ban pynskhem ia ka jingiadei bad ka India bad ban iatrei lang ruh kham bha ban ia kaba ju long baroh shi katta.
Ha u bnai ba la lah, ka Canada ka la pynmih noh ia 41 ngut ki heh na India bad ka la pynsangeh noh ia ka jingsam Visa jong ki tnat sam Visa kiba don ha Chandigarh, Mumbai bad ha Bengaluru namar ka jingïakynad bad ka India ha kine ki bnai.
Hynrei na ka liang jong ka India ruh, la ong ba ka India kam shym la lah ban pynïoh ia ki sabut bad ki jing pynshisha ba kam shym la ïadon bynta ha ka jingpyniap ia u lehnoh uba dei u nongshong shnong trai ka Canada bad uba la shah pyniap hapoh u pud- u sam jong ka ri Canada hi.
