Shillong, Naiweing 15
U khlur ïakura ka Jylla u Shanborlang Marbaniang un pynkhreh ban leit ïashim bynta ha ka Arunachal Pro Boxing ban pynlong ha Arunachal Pradesh ha ka sngi Saitjaiñ.
Ha kane ka kynti kaba mynta u Shanbor ba dang 23 snem ka rta un kiew rynsan ban ïakhun pyrshah ïa u rangïakura na Arunachal u Kumar Gurung ha ka kyrdan ïakura Super Fly Weight 52kg ka ban long ha Itanagar.
Kane ka jingïakhun ha Arunachal kan dei kaba kongsan ha shwa ba un pynkhreh ban kiew rynsan sa ha ka jingïakop bad kiwei ki khlur ïakura kiba nabar ri (International Fight) ka ban mynta u bnai ha nongbah Delhi
Kane ka long ka sien ba hynriew ba un kiew rynsan ha ka Professional Boxing naduh ba u la khur jingjop ar sien ha ka Marine Pro Boxing Promotion ha u snem 2022 kaba la long ha Mumbai bad ha Gujarat mynta u snem, katba u la ïakhaid pat lai sien ha ka Professional Boxing kaba la long ha u snem 2022 bad 2023 ha Manipur.
Dangshen ha ka Professional Boxing ba la pynlong da ka Vadodara Combat Academy kaba hap hapoh ka jingkhmih jong ka Indian Boxing Council ha Gujarat, u Shanbor u la lah ban pynliem ïa u pynliem ïa u Anakapalli Madanpratap uba na Andhra Pradesh lyngba ka knockout ha ka wat kaba lai jong ka kyrdan ïakura Super Fly Weight 52kg.
Ha kaba ïadei bad kane ka jingleit ïashim bynta, u Shanbor u la pynpaw ïa ka jingkhmih lynti ban ïalehkai bha ha kane ka rynsan ïakura kaba hynriew. Nga la pynkhreh bha na ka bynta kane ka jingïakhun bad nga khmih lynti ban ïalehkai bha khnang ba ngan lah ban kynjoh sha ka thong.”
Ïa une u khlur ïakura la ai jinghikai da ki ar ngut ki coach kata u Rishanlang Lyngdoh bad u Renold Nongsiej lai sien ha ka shi sngi kata mynstep, mynsngi bad janmiet.
“Kumba ngi la ai jinghikai met bad mynsiem na ka bynta jong u ngi khmih lynti ba un lah ban khur ïa ka jingjop ha katei ka rynsan ïakura,” la pynpaw u Rishanlang haba ïakren bad ki nongthoh khubor ha ka sngi Balang.
Ha kawei pat ka liang u Secretary ka Meghalaya Professional Boxing Council (MPBC) u Kampherkii Thangkhiew u la pynpaw ka jingai khublei ïa ki coach kiba la trei shitom met bad mynsiem na ka bynta ban pynbit pynbiang ïa u Shanbor u ban leit ïashim bynta ha ki rynsan ïakura bapher bapher. U la ai khublei ruh ïa ki katto katne kiba ïarap ban noh synñiang sha kane ka synjuk na ka bynta ban pyntyllun ia ki kam ki jam jong ka.
Ha kaba ïadei bad ka rynsan ïakop jong ka International Fight ka ban ssa long shen ha ka nongbah Delhi, u Secretary u la ïathuh na ka liang ka Indian Boxing Council ka la pynkhreh ïa u Shanbor ban soi noh ïa ka kontrak na ka bynta ki International Fight.
Te kumta u Shanbor un pynkhreh ruh ban ïashim bynta ruh ha ka International Fight ka ban long ha nongbah Delhi ha ka 25 tarik mynta u bnai pyrshah ïa uwei na ki rangïakura uba na Nigeria u Aliu Bamidele Lasisi, uba la jop haduh 17 sien.
