Shillong, Naiwieng 15
Ka Mawtawar SC ka la khur ïa ka jingjop kaba nyngkong ha ka lympung ïalehkai Second Division Football League, hadien ba ka la lah ban pynliem noh ïa ka Marbisu SC da 3-1 kol ha ka sngi Balang ha madan MFA (3rd Ground), Polo.
U Elnathan Wahlang u la khur ïa ka hat-trick na ka bynta ban pynlong ïa ka Mawtawar ban khur ïa ki lai point.
Tang mar ïasdang ka Mawtawar ka la pynkhih jar nyngkong eh lyngba u Elnathan ha ka minit kaba 7 na ka bynta ban tam shi kol ha ka kylla step. Hynrei dei ha ka kylla miet ba ka Marbisu ka la lah ban pynphai kylla shi kol lyngba u Paul Nongdhar ha ka minit kab 62.
U Elnathan Wahlang u la ïoh ban thep biang sa ar kol (64 & 75) na ka bynta ban khur syndon ïa ka hat-trick bad ban pynlong ïa ka Mawtawar ban khur ïa ka jingjop.
Haba phai sha kawei pat ka jingïakhun kaba la long kham hashwa hapdeng ka Smit SC bad ka Nongrah SC ki la ïasam mar shi point hadien ba ki la ïakhaid mar 1-1 kol.
Tang mar ïasdang ka Nongrah ka la ïoh ban pynkhih jar nyngkong eh lyngba u Dawandappura Pathaw ha ka minit kaba 8, hynrei ka Smit ka la lah ban pynphai kylla lyngba u Bansynran Mylliemngap ha ka minit kaba 30.
Kane ka lympung kan bteng biang ha ka sngi Palei ha kaba ka Sohryngkham SC kan ïakhun pyrshah ïa ka Laitlyngkot SC ha ka por 11:30 mynstep ha 1st Ground SSA Stadium, katba ka Jongksha SC ïa ka Nongkrem SC ha ka por 2:30 janmiet.
