Shillong, Naiwieng 15
Sa shisien pat ka India ka la lah ban pynliem biang ïa ka New Zealand da 70 run na ka bynta ban jam sha ka final ha ka ICC Cricket World Cup ha ka sngi Balang ha Wankhede Stadium kaba ha Mumbai.
Kane nam jop ka la wan urlong lyngba u Mohammed Shami uba la lah ban pynkhyllem haduh hynñiew wiket.
Kane ka kynhun ïalehkai ka ri hapoh ka jingïalam u Rohit Sharma kum u kapten, ka la shimti shwa ban tied nyng-kong ha kaba ka la kamai 397 run bad sha pynkhyllem 4 wiket ha ki 50 over.
U Virat Kohli uba la khmih lynti ban pynpra ïa ka rekod jong u kapten barim ka Australia u Ricky Ponting, u la lah ban kamai ïa ka spah run da kaba ïoh 117 run na ki 113 bol kaba kynthup ïa 9 tylli ki ‘four’ bad 2 tylli ki ‘six’. Ïa kawei pat ka spah run la ïoh da u Shreyas Lyer, uba la tied 105 run na ki 70 bol (4x4s & 8x6s), katba u Shubman Gill u bym shym la shah pynhap wiket, u la tied ïa ka shteng spah run kaba 80 run na ki 66 bol.
Haba wan beh ïa ka thong ba la buh da ka India, ka New Zealand ka la shah pynkhyllem baroh ki nongtied na ka bynta ban kamai tang 327 run ha ki 48.5 over. U Daryl Mitchell u la long u nongtied uba la ioh bun ha kaba u la lah ban kamai ïa ka spah run kaba 134 run na ki 119 bol (9x4s & 7x6s), katba u kapten kane ka kynhun u Kane Williamson u la khyrwit ïa ka shiteng spah run kaba 69 na ki 73 bol (8x4s & 1x6s).
Lyngba kane ka jingjop, ka India kan pynkhreh ïa ka jingïakhun final ka ban long ha ka sngi U Blei pyrshah ïa ka kynhun ka ban khur jingjop ha kawei pat ka jingiakhun semi final hapdeng ka South Africa bad ka Australia, ki ban ïakhun ha ka sngi Palei ha Eden Gardens.
