Jerusalem, Naiwieng:
Katkum ki khubor la ong ba ki shipai ka Israel ha ka Sngi Nyngkong, ki la ioh leit poi sha ka khyrdop jong ka hospital ba heh duh hapoh ka nongbah Gaza hadien ka jingthmu ban ioh knieh hi noh syndon ia ka bor synshar hapoh Gaza Strip. Ha katei ka sngi la ong ba ki doktor bad ki nongtrei jong katei ka hospital kaba heh duh hapoh Gaza, ki la dap da ka jingsyier namar ki shipai jong ka Israel ki la ker tawiar ia katei ka jaka ba don katei ka hospital.
Kumjuh ruh u Myntri ka tnat ka koit ka khiah jong ka Gaza, u Ashraf Al-Qidra uba don lang hapoh jong katei ka hospital Al Shifa, u la pyntip ba ki don haduh 32 ngut ki nongpang kiba don ha katei ka hospital kynthup ia 3 ngut ki khyllung ba dang shu kha bad kiba la khlad noh namar ka jingthut ha ki liang ba bun bad wat ka bor ding ilektrik ruh kam don shuh.
Kat haduh jong ka step Sngi Ba-ar, la ong ba ki dang don kumba 650 ngut ki nongpang kiba dang thiah pang hapoh jong katei ka jaka sumar bad ki bym shym lah ban pynpoi sha Red Cross ne sha kiwei pat ki jaka sumar kiba kham biang wat haba la donkam ban pynkynriah noh ia ki.
Namar la ong ba ki tup-ki man jong ki shipai ka Israel ki la leit poi bad ki la kerkut wat ia ka khyrdop jong katei ka hospital bad kim lait shuh wat tang ban iaid ban leit shaei-shaei ruh. Kumta ki bor pyniaid jong katei ka hospital bad ki bor pyniaid ka Gaza ki la dawa ia ka Israel ba ka dei ban phah kynriah ia ki shipai bad ki tup jongki na katei ka jaka khnang ba katei ka hospital kan ioh ban trei- ban ktah ha ka rukom kaba dei bad kan pynsuk ia ka jingleit-jingwan haba donkam ban pynkit ne ban pynpoi ia ki jingdonkam.
Ki la mih ruh ki khubor ba katei ka thma ka Israel ka lah ban pur wat sha kiwei ruh ki ri shabar jong ka Gaza, namar ka la mih ka jingbyrngem na ki ri Muslim kiba don marjan bad ka Israel bad wat ka United States ruh ka la leit ther bom ia ki ktem lehnoh kiba don jingiadei bad ka Iran hapoh Syria.
Ka Israel ka la sdang ban pynhiar kput ia ki lehnoh Hamas hapoh Gaza hadien ba ka Hamas ka la leit thombor ia ka Israel ha ka 7 tarik u Risaw bad kaba la shim ia palat 1,200 tam ki paidbah nongshong shnong ka Israel, kynthup ia ki shipai bad ki bor pahara jong ka Israel.
