Shillong, Naiwieng 15
Ka Pay For Right Football Academy bad ka Mylliem Lum SC ki la jam sha ka final ha ka lympung ïalehkai 3rd Division Football League 2023 ba la pynïaid da ka Shillong Sports Association bad kin pynkhreh ban ïaknieh ïa ka nam lahduh ha ka 20 tarik mynta u bnai.
Ha ka jingïakhun semi final kaba la long ha ka sngi Balang ha 1st Ground SSA Stadium Polo, ka shlem ai jinghikai jong ka PFR ka la lah ban pynliem noh ïa ka Meghalaya Police F.T da 1-0 kol. Ïa kane ka shi kol la thep da u Thymmaibor Mukhim ha ka minit kaba 63.
Haba phai sha ka jingïakhun semi final kaba ar, ka Mylliem Lum ka la lah ban pynliem noh ïa ka Nongkseh SC da 2-1 kol. U Eliastar Nongsiej u la ïoh ban thep ar kol na ka bynta ka Mylliem Lum ha ka minit kaba 6 & 88, katba ka Nongkseh ka la pynphai kylla shi kol lyngba u Jowel Khongdup ha ka minit kaba 9.
Lyngba kane ka jingïoh rung final, ka PFR bad ka Mylliem Lum ki la kiew kyrdan sha ka Second Division ha kaba kin ïoh ban ïashim bynta ha u snem ban wan.
