Shillong, Naiwieng 16
Ka kynhun ki ‘thei ïaleh -kai ka Jylla ka la mad biang ïa ka jingshah rem kaba lai sa ha ka Arunachal Pradesh ha kaba ka la shah pynjem khnap haduh 6-1 kol ha ka lympung ïalehkai 28th Senior Women’s National Football Championship 2023-24 kaba la long ha ka sngi Palei ha Sundargarh Stadium kaba ha Odisha.
Ka Yumlam Lali ka la khur ïa ka hat-trick bad ka la ïohpdiang ruh ïa ka khusnam Player of the match.
Ha kane ka lympung ïalehkai ka Meghalaya hapoh ka jingïalam ka Kong Ïaikyntiew Nong-kynrih kam shym la lah ban ïalehkai bha naduh kaba sdang jong ka Group-E ha kaba ka la shah rem haduh lai sien lynter bad ka jingïaid lynti ha kane ka lympung ka la poi sha kaba kut.
Kumba ka paw ka Arunachal Pradesh ka la lah ban ïalehkai bha naduh kaba sdang ha kaba ka la ïoh ban thep kol nyngkong ha ka minit kaba 19 lyngba ka Yumlam Lali. Kane ka shi kol ka la ïai neh haduh kaba kut jong ka kylla step na ka daw ba ka Meghalaya kam shym la lah ban pynphai.
Hadien ba la bteng biang ïa ka jingïakhun jong ka kylla miet ka Arunachal ka la pynbud biang ïa ka kol kaba ar ha ka minit kaba 55 lyngba ka Yumlam. Hynrei hadien ar minit ka Meghalaya ka la lah ban pynphai kylla shi kol lyngba ka Marbarin Nongrum.
Watla ka Meghalaya ka la lah ban pynphai shi kol, pynban ka la shah thep biang sa ar kol lyngba ka Yumlam ha ka minit kaba 60 bad ka Kai Rumi ha ka minit kaba 64 na ka bynta ban tam da 4-1 kol.
Hashwa ban wai ka Yumlam ka la thep biang sa shi kol ha ka minit kaba 83 na ka bynta ban khur ïa ka hat-trick bad ïa kawei pat ka kol la thep da ka Giani Ramching Mara ha ka minit kaba 90+1 na ka bynta ban pynlong ïa ka Arunachal ban khur syndon ïa ka jingjop.
Ka Meghalaya kan pynkhreh biang sa ka jingïakhun kaba khatduh pyrshah ïa ka Goa ha ka 19 tarik hashwa ba kan wanphai noh sha la ïing.
