Katkum ka khubor kaba mih ha ka 23 tarik Risaw 2023 ba ka Sorkar Meghalaya ka la kwah ban pynpoi ïa ka Lynti Rel shaduh East Jaiñtia Hills District, Meghalaya da kaba ong ba lada kit ki Truck ïa u Dewiong shi Truck kan shong dor 2000/- tyngka bad ynda la wan da Lynti Rel ka bai kit nong kan long 500/- shi Truck bad ka jingiohnong jong u paidbah kan long kaba jur bha.
Mynshuwa ha ka por uba synshar ka Sorkar Phareng ka la shna ïa ka Lynti Rel lyngba ki jaka ka Jaiñtia ha Ri Thor haduh Borderpur. Hynrei mynta ka Sorkar ka la tip ïa kane ka jaka ka Jaiñtia ha Ri Thor bad ka kwah ban shna ïa ka Lynti Rel naduh Kalain lyngba ka Ratacherra (la khajia Pud Assam & Meghalaya) bad shaduh Umkiang – Lumshnong shaduh Khliehriat, kane ka long ka jingpeit bniah jong ka Sorkar Meghalaya na ka bynta ka jingmyntoi u paidbah Khasi Jaintia Hills District.
Hynrei katba ka long mynta ba ka Sorkar kam pat pyntreikam ïa ka ILP hapoh Khasi Jaiñtia ka long kaba eh ïa ngi ki Khasi Jaiñtia ba u Dkhar ne u Nongwei uba na Bangladesh bad kiwei kiwei kin wan tyllep ïa ngi ki paidbah Khasi khlem don kano kano ka aiñ kaba khlaiñ ka ban ïada ïa ngi ki Khasi Pnar. Kumta ka Sorkar ka dei ban pyntreikam noh ïa kane ka ILP hapoh Khasi Jaintia bad sa pynpoi ïa ka Lyntri Rel shaduh East Jaiñtia Hills District, Meghalaya.
Ka Jaiñtia Dorbar ka pyrshah jur ïa ka Sorkar Meghalaya ban pynpoi ïa ka Lynti Rel shapoh East Jaiñtia Hills District lymda kan pyntreikam shwa ïa ka ILP hapoh Khasi Jaiñtia ban long ka aiñ kaba khlaiñ ban ïada ïa ngi ki Khasi Pnar na ka jingwan rung jubor u mynder Ri hapoh Jaiñtia Hills.
B. Sari
President
Jaiñtia Dorbar, West Jaiñtia Hills District, Meghalaya
