Beijing, Naiwieng:
Katkum ki khubor la ong ba 11 ngut ki la khlad noh bad kumba 51 ngut pat ki la mynsaw bad la pynkit sha ki jakasumar bapher bapher hadien ba kem ding ka ïingmala ha ka thaiñ Shatei jong ka China hapoh ka nongbah Shanxi.
Katei ka ding ka la sdang ban klang na ka mala kaba saw kaba dei jong ka kompeni Yongju. Kane ka la jia hapoh ka distrik Lishi jong ka nongbah Luliang kaba don hapoh ka thaiñ Shanxi kaba ka la jia ha ka por kumba 6:50 jong ka step Sngi Balang.
Ki tnat iarap ki la pyntikna ba 11 ngut kiba la ioh sei na katei ka jaka ki dei kiba la khlad noh syndon hapoh jong katei ka jaka. Katba ia kitei ki 51 ngut pat la ioh ban sei noh bad la pynkit pat mar-mar sha ki jaka sumar bapher bapher kiba don ha katei hi ka nongbah.
Ki tnat iarap ki la ioh ban pyllait ia 63 ngut ki briew na katei ka jaka, ha kaba la pynkit noh pat ia kitei ki 51 ngut sha ki jaka sumar naka bynta ki jingsumar ba bniah.
Haduh mynta ym pat lah pat ban tip ia ka daw jong katei ka jingkem ding ha katei ka mala ba 4 jong katei ka ïingmala hynrei la iohi ia ka tdem iong kaba rben bha kaba mih na katei ka ïingmala ha katei ka step.
