Shillong, Naiwieng 16
Ka Australia ka la jam sha ka final ha ka sien kaba phra ha ka ICC Cricket World Cup. Kane ka wan urlong hadien ba ka lah ban pynliem noh ïa ka South Africa da 3 wiket ha ka Sngi Palei ha Eden Gardens.
Haba wan beh ïa ka thong kaba 213 run ha ka jingïakhun semi final kaba ar, u Travis Head u la ïoh ïa ka shiteng spah run da kaba ïoh 62 run na ki 48 bol, katba u David Warner u la tied tang 29 run na ki 18 bol.
Hadien ba la jop ïa ka kynting pisa, ka South Africa ka la shimti ban tied nyngkong ha kaba ka la lah ban kamai 212 run bad shah pynkhyllem baroh ki nongtied ha ki 49.4 over. U David Miller u la long u nongtied uba la ïoh bun eh napdeng ki rangïalehkai ha kaba u la khyrwit ïa ka spah run kaba 101 na ki 116 bol, kynthup ïa 8 tylli ki ‘four’ bad 5 tylli ki ‘six’. Katba u Heinrich Klaasen u la tied 47 run na ki 48 bol (4x6s & 2x4s).
U Mitchell Starc lem bad u kapten u Pat Cummins ki la khur mar 3 wiket, katba ïa ki ar wiket la khur da u Josh Hazlewood bad u Travis Head.
Kumba ka paw ka Australia ka la shem jingeh ban kamai run na ka daw ka jingïalehkai bha ki nongka-wang bol ka South Africa, hynrei ha kaba kut ka la lah ban kynjoh sha ka thong da kaba kamai 215 run ha ki 47.2 over.
Lyngba ka jingjop, ka Australia kan pynkhreh ban ïaknieh ïa ka nam lahduh pyrshah ïa ka India ha ka sngi U Blei ha Narendra Modi Stadium kaba ha Gujarat.
