New Delhi, Naiwieng:
Ka Israel ha kane ka kynti ka la pynshisha ba la lap ia ki tiar pynbthei bad ki tiar siat jong ki lehnoh Hamas na ka hospital ha Gaza. Ha kawei ka dur-khih ba la pynsaphriang paidbah da ki shipai ka Israel, ki shipai Israeli Defence Force (IDF) ki la pyni ia kitei ki tiar ba la ioh sei na ka ïing mala MRI hapoh Al-Shifa Hospital bad ki la pynshisha ruh ba ka Hamas ka pyndonkam ia katei ka hospital kum ka jaka buhrieh tiar.
Ka tnat shipai IDF ha ka sngi kaba bud ruh ka dang bteng ia ka jingleit khynra bad jingwad bniah ha katei ka hospital Al-Shifa ha kaba la suba ruh ba ki lehnoh Hamas ki pyndonkam ia katei ka jaka kum ka jaka rieh tngen namar dei ki riew paidbah kiba thiah pang ha katei ka hospital bad kumta ki la sngewthuh ba kan nym jia eiei lada ki rieh sha lyndet jong katei ka jaka.
Ia katei ka video la pynshisha ba kam dei kaba shu shna ne ‘edit’ hynrei kitei ki shipai ki la leit hi dalade ban pynshisha hakhmat ka camera ba ia kitei ki tiar la leit ban tih bad la lap ruh na kylleng ki bynta jong katei ka hospital Al-Shifa kaba don hapoh Gaza.
Kumta, ki shipai ka Israel ki la ong ba khlem jing artatien, la tikna beit ba ki lehnoh Hamas ki la pyndonkam ia ki hospital kum ki jaka rieh tngen bad ki lah ruh ban buhrieh shuh shuh ia kiei-kiei kiba dang bun bad ka tnat shipai mynta ka dang leit ban wad bniah bad ban tih jylliew khnang ban nang lap ksai shuh shuh ia kiei- kiei baroh.
Watla katta, la ong ba ki don bun ki tnat bad ki ri kiba la pyrshah ia katei ka jingkynnoh jong ki shipai Israel bad ong ba ka long tang ka jing pynthame ban ioh ban thombor ia ka Gaza haduh ban da um luit khoit.
