Shillong, Naiwieng 16
Ka kynhun ïalehkai Under-19 jong ka Shillong Lajong FC ka la jam sha ka final ha ka Oil-DFA All India Level Under-19 Inter-Academy Invitational Football Tournament 2023 hadien ba lah pynliem ïa ka Classic FA na Imphal da 1-0 kol.
Kane ka shi kol ka la wan urlong lyngba u Rimankhraw Kharumnuid na ka bynta ban pynlong ïa kane ka kynhun ïalehkai ka nongbah ban jam sha katei ka kyrdan. Ha kane ka jingïakhun u Badondor Marbaniang u la ïohpdiang ïa ka khusnam Man of the Match.
Lyngba kane ka nam jop ka Lajong kan pynkhreh ban ïaknieh ïa ka nam lahduh pyrshah ïa ka kynhun ka ban khur jingjop ha ka semi final kaba ar hapdeng ka SAI, Manipur bad ka Siniolchu FC kaba na Sikkim.
Ïa kane ka jingïakhun final yn pynlong ha ka lah sngi U Blei (20 tarik) ha ka por 7 baje janmiet ha Duliajan, Assam.
Kum ban shu pynkynmaw ha ka semi final, ka Lajong ka la lah ban pynliem ïa ka SAIL, Bokaro da 4-0 kol. U Deibormame Tongper u la khur ïa ka hat-trick hadien ba u la ïoh ban thep lai kol, katba ïa ka shi kol la thep da u Nakul Ajay.
