Shillong, Naiwieng 16
Ki ar kol ba la thep da u Shankupar Kharbyngar ki la biang pura ïa ka Nongkrem SC ban khur ïa ka jingjop kaba ar ha ka Second Division Football League 2023 ba la pynïaid da ka Shillong Sports Association. Kane ka wan urlong hadien ba ka lah pynliem noh ïa ka Jongksha SC da 3-2 kol ha ka sngi Palei.
Ha kane ka jingïakhun jong ka Group-A kaba la long ha 1st Ground SSA Stadium kaba ha Polo, baroh ar tylli ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol.
Kane ka jingïai pyrshang ka la pynlong ïa ka Jongksha ban ïoh pynkhih jar nyngkong eh hashwa ban kut ka jingïalehkai jong ka kylla step lyngba u Jorboklang khongsngi ha ka minit kaba 45.
Hadien katto katne por ba la bteng ïa ka jingïakhun jong ka kylla miet, ki rangïalehkai ka Nongkrem ki la pyrshang ban ïakhun tyngeh bad dei ha ka minit kaba 60 ba ka la lah ban pynphai kylla shi kol lyngba u Iumeda Mawroh. Hadien khyndai minit ka Jongksha ka la ïoh ban thep ïa ka kol kaba ar lyngba u Babiang Umsong na ka bynta ban tam da 2-1 kol.
Watla ka Nongkrem ka la shah thep kol, hynrei kam shym la duh mynsiem bad ka la lah ban pynphai kylla ar kol lyngba u Shankupar Kharbyngar ha ka minit kaba 85 & 90+3 na ka bynta ban khur syndon ïa ka jingjop bad ban kamai 6 point na ki ar sien ïakhun jong katei ka group.
Haba phai sha kawei pat ka jingïakhun kaba la long kham hashwa hapdeng ka Sohryngkham SC bad ka Laitlyngkot SC ki la ïasam mar shi point hadien ba ki la ïakhaid mar 1-1 kol.
Kane ka shi kol jong ka Sohryngkham la ïarap pynthep da u rangïalehkai ka Laitlyngkot u Shanker Kshiar ha ka minit kaba 17, hynrei une u rangïalehkai u la ïoh ban pynphai kylla ha ka minit kaba 71 na ka bynta ban ïakhaid mar shi kol.
Ka jingialehkai ha ka sngi Thohdieng kan long hapdeng ka Pohkseh SC pyrshah ia ka Umphrup SC ha ka por 11:30 mynstep, katba ka Laitkyrhong SC ia ka Lumshyiap SC ha ka por 2:30 janmiet.
