Jowai, Naiwieng 16
Ka Sailung Ïalong ka la pynjem khnap ïa ka Shangpung Lumiawmushai da 5-0 kol ha ka lympung ïalehkai Super Division Football Tournament na ka bynta U Kiang Nangbah Memorial Trophy 2023 ba la pynïaid da ka West Jaiñtia District Sports Association (WJDSA).
U Mebakynsai Pale u la ïoh ban thep ar kol ha kane ka jingïalehkai kaba long ha ka sngi Palei ha Kiang Nangbah Stadium kaba ha Ladthadlaboh, Jowai na ka bynta ban pynlong ïa ktei ka kynhun ban khur ïa ki lai point.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang ha kaba ki la pyrshang ban ïoh thep kol, hynrei kim shym la lah ban pynurlong.
Hashwa ban kut ka jingïalehkai jong ka kylla step, ka Sailung Ïalong ka la ïoh ban pynkhih jar nyngkong eh lyngba u Mebakynsai Pale ha ka minit kaba 40. Kane ka kynhun ka la pynbud biang ïa ka kol kaba ar lyngba u Sandeep Siangshai ha ka minit kaba 45+1 na ka bynta ban tam 2-0 kol ha ka kylla step.
Hadien katto katne por ba la bteng ïa ka jingiakhun jong ka kylla miet u Mebakynsai u la thep biang ïa ka kol kaba ar ka jong u ha ka minit kaba 57. Ka Sailung Ïalong ka la ïoh ei shi kol na ka daw ka jingbakla thep hi u rangïalehkai ka liang pyrshah u Heibormi Sungoh haka minit kaba 80.
Hashwa ban wai ka Sailung Ïalong ka la thep ïa ka kol kaba khatduh lyngba u Soniroi Suchiang ha ka minit kaba 88 na ka bynta ban khur syndon ïa ka jingjop.
Kane ka lympung kan bteng biang ha ka 20 tarik ha kaba ka jingïakhun kan long hapdeng ka Mynthong pyrshah ïa ka Niaw Wasa United ha ka por 1:30 nohphai sngi.
