Washington, Naiwieng:
Ki pulit ka United States ha ka Sngi Balang ki la iathuh ba kawei ka long-kmie na Virginia ka la shah rai set patok haduh kumba 21 bnai namar ka jingleh kam runar jong u khun ba dang 6 snem uba la siat bad pynmynsaw ia ki nonghikai jong u ha ki khyndiat por ba la leit.
La ong ba utei u khun ba 6 snem jong katei ka briew kaba la tip kyrteng ka Deja Taylor, u la leit rah ia ka suloi sha ka skul kaba u pule ha Southern US ha ka 6 tarik u Kyllalyngkot bad u la siat ia ka nonghikai jong u ha katei ka por.
Katei ka nonghikai ka la thiah hospital haduh 2 taiew tam namar ki jingmynsaw ha ki bynta jong ka kti ba ka shah siat ha katei ka jingjia.
Kumta, ka ïingbishar ha u Jylliew jong une u snem, ka la rai pynrem ia katei ka kmie jong utei u khynnah rit halor ka jing ailad ia utei u khynnah rit ba un rah bad kit ia ka suloi wat haba leit sha skul.
Na ka liang jong ka Taylor, ka la kyntait ba kam shym la dih wat tang ka kyiad, ne kino kino ki kynja duma ne kynja droks ban pynbuaid bad ba kam ju ai mynsiem ruh ia u khun jongka ban leh ia kum kitei ki kam runar.
Namarkata, ka ïingbishar ka la rai ban shu pynngat kyndon da kaba set patok ia katei ka longkmie haduh 1 snem bad khyndai bnai namar katei ka jingleh pynkheiñ aiñ u khun ba dang 6 snem jongka.
Namar ka jingjur jong ki kam runar bad ki jingjia synreit kuli khamtam haba ki nongleh pynkheiñ aiñ ki dei ki khynnah kiba dang rit rta, ki bor pyniaid ki la wanrah da ka aiñ ban pynshitom ia ki kmie- ki kpa lada ki khun jongki, ki leh ia kano- kano ka kam kaba long be-aiñ namar la ju tip ba dei ka jinghikai na iing kaba ialam bakla ia ki khun- ki kti bad ba kin nud ban pynpaw shabar jong ka iing.
