Shillong, Naiwieng 17
Ka Uruguay ka la lah ban pynliem ïa ka Argentina kaba dei ka lahduh jong ka FIFA World Cup 2022 da 2-0 kol ha La Bombonera Stadium kaba ha Buenos Aires ha ka lympung ïaknieh jong ka World Cup.
Kane ka long ka jingjop kaba kongsan eh na ka bynta u coach uba thymmai u Marcelo Bielsa.
Kumba ka paw ka Argentina kam pat ju shah rem ha ki jingïakhun naduh ka jingïalehkai group kaba nyngkong pyrshah ïa ka Saudi Arabia ha u snem ba la dep ha ka World Cup kaba la long ha Qatar.
Watla ka Argentina ka la mad ïa ka jingshah rem kaba nyngkong, pynban ka dangbat ïa ka kyrdan ba hakhlieh napdeng ki shiphew tylli ki kynhun ki ban ïaknieh na South America (qualifying group) ha kaba ka la kamai 12 point na ki san sien ïakhun. Ka Uruguay ka la wan ha ka kyrdan ba-ar da kaba kamai 10 point. Ïa ka kyrdan ba khyndai la bud sa ka Colombia bad ba phra ka Venezuela.
Ka Brazil ka ban sa ïakhun pyrshah ïa katei ka lahduh ha Maracana Stadium kaba ha Rio de Janeiro ha ka 22 tarik mynta u bnai, ka la don ha ka kyrdan basan bad kamai 7 point.
Kumba ka paw ka Uruguay ka la ïalehkai bha naduh kaba sdang pyrshah ïa katei ka lahduh jong ka World Cup.
Ha kaba sdang u Darwin Nunez u la jan ïoh thep kol ha ka minit kaba 10 na ka daw ka jingbakla u rangïalehkai ‘dien ka Argentina u Nicolas Otamendi.
Kane ka long ka sien kaba nyngkong naduh ba ka Argentina ka la khur ïa ka nam lahduh World Cup, ba kane ka kynhun hapoh ka jingïalam u Lionel Scaloni ka la shem jingeh ha ka bynta kaba shapdeng ban khanglad na ka jingpyrshang ki rangïalehkai ka Uruguay.
Kane ka jingbym lah ban teh lakam ka la pynlong ia ka Uruguay ban pynkhih jar ha ka minit kaba 42 ha kaba u Matias Viña u la ïoh da kaba suk ban knieh ïa ka bol na u Nahuel Molina ban rah hapoh ‘box’ bad dei hangne ba u Ronald Araujo um shym la pynlehnohei ïa kane ka kabu ksiar.
Ha ka jingshisha ka Argentina ka la ioh ïa ki kabu ban pynphai lyngba ka free kick ba la shut da u Messi, hynrei u rangapkol u Sergio Rochet u la lah ban pyllait na ka jingthep ha ka kylla step.
Hadien katto katne por ba la bteng ïa ka jingïakhun jong ka kylla miet, ka Uruguay bad ka Argentina ka la pyrshang ban ïakhun tyngeh. U Messi sa shisien pat lem bad u Angel di Maria ki la pyrshang ban pynurlong ïa ki kabu ksiar hynrei kim shym la lah. U Messi u la ïoh ban shut ïa ka bol lyng -ba ka free-kick ha kaba ka la leit dei na diengkol ha ka minit kaba 57.
Hashwa ban wai u Nunez u la ïoh ban thep ha ka minit kaba 87 bad kane ka la wan hadien ba ki rangïalehkai ‘dien ka Uruguay ki la lah ban khang lad ia ki jingpyrshang jong u Messi.
“Ngin shym la lah ban ïalehkai bha ha kane ka jingïakhun,” la pynpaw u Messi hadien ba la kut ka jingïalehkai.
“Ki rangïalehkai ka Uruguay ki long kiba khlaiñ bor bad ki long kiba trei shitom.”
Kham hashwa ha kane ka lympung ïaknieh rung World Cup, ka Uruguay ka la lah ban pynliem ruh ïa ka Brazil da 1-0 kol. Ka jingïakhun ka ban wan kan long pyrshah ïa ka Bolivia.
Haba phai sha katei pat ka jingïakhun jong kane ka group, ka Colum -bia ka la pynliem noh ïa ka Brazil da 2-1 kol.
Kane ka la wan urlong lyngba u Luis Diaz uba la thep ar kol ha ka minit kaba 75 & 79, katba u Gabriel Martinelli u la ïoh pynkhih jar nyngkong na ka bynta ka Brazil ha ka minit kaba 4.
